ശ്രീജിത്തിന്റെ ശരീരത്തില്‍ 22 മുറിവുകള്‍ ഉണ്ടായിരുന്നതായി പോസ്റ്റ്‌മോര്‍ട്ടം റിപ്പോര്‍ട്ട്

കൊച്ചി: വരാപ്പുഴയില്‍ പൊലീസ് കസ്റ്റഡിയില്‍ മരിച്ച ശ്രീജിത്തിന്റെ ശരീരത്തില്‍ ആകെ 22 മുറിവുകള്‍ ഉണ്ടായിരുന്നതായി പോസ്റ്റ്‌മോര്‍ട്ടം റിപ്പോര്‍ട്ട്. ശസ്ത്രക്രിയ ചെയ്തതുള്‍പ്പടെ 22 മുറിവുകളാണ് ശ്രീജിത്തിന്റെ ശരീരത്തില്‍ ഉണ്ടായിരുന്നത്. ഇതില്‍ 18 ക്ഷതങ്ങള്‍ നേരത്തെ സംഭവിച്ചതാണ്. ശക്തമായ ഇടിയില്‍ മൂക്കില്‍ രണ്ട് മുറിവുകള്‍ ഉണ്ടായി. മൂക്കിന്റെ പാലം തകര്‍ന്നിട്ടുണ്ട്. ശ്രീജിത്തിനെ ആശുപത്രിയില്‍ പ്രവേശിപ്പിച്ചപ്പോള്‍ ചെറുകുടല്‍ പൊട്ടി ഭക്ഷണ പദാര്‍ത്ഥങ്ങള്‍ വയറിനുള്ളില്‍ കലര്‍ന്ന അവസ്ഥയിലായിരുന്നു.

ശക്തമായ ചവിട്ടേറ്റല്‍ മാത്രമേ ചെറുകുടലിലെ ജെജുനം എന്ന ഭാഗത്ത് ഇത്തരത്തില്‍ മുറിവുണ്ടാകൂ എന്നാണ് ഫോറന്‍സിക് വിഭാഗത്തിന്റെ കണക്ക് കൂട്ടല്‍. ടിവയറ്റിലും നെഞ്ചിലും ക്ഷതമേറ്റ പാടുകളും കണ്ടെത്തിയിട്ടുണ്ട്. തുടയില്‍ ചവിട്ടേറ്റ ക്ഷതവും ഡോക്ടര്‍മാര്‍ക്ക് കണ്ടെത്താനായി. ചെറുകുടലിലെ മുറിവും അണുബാധയും മരണത്തിലേക്കു നയിച്ചെന്നും പോസ്റ്റ്‌മോര്‍ട്ടം റിപ്പോര്‍ട്ട് വ്യക്തമാക്കുന്നു.