സംസ്ഥാനത്ത് പച്ചക്കറി വിലയില്‍ വന്‍ വര്‍ധനവ്

തിരുവനന്തപുരം: സംസ്ഥാനത്ത് പച്ചക്കറി വില കുതിച്ചുയരുന്നു. പ്രതികൂല കാലാവസ്ഥയും മറ്റു സംസ്ഥാനങ്ങളിൽ നിന്നുള്ള പച്ചക്കറികളുടെ വരവ് കുറഞ്ഞതുമാണ് വില വർധിക്കാനുള്ള കാരണമായി ചൂണ്ടികാണിക്കുന്നത്. തക്കാളിക്കും, ചെറിയ ഉള്ളിക്കും, പയറിനും, മുളകിനും, പാവക്കയ്ക്കും, കൂര്‍ക്കയ്ക്കും, പടവലത്തിനും വില ഇരട്ടിയായി. ഉണക്ക മത്സ്യത്തിന്‍റെ വിലയും വർധിച്ചിട്ടുണ്ട്.

കനത്ത മഴ കാരണം പ്രാദേശിക പച്ചക്കറി ഉത്പാദനം കുറഞ്ഞതാണ് തിരിച്ചടിയായത്. ഫോര്‍മാലിന്‍ ചേര്‍ത്ത മത്സ്യങ്ങള്‍ പിടിച്ചെടുത്തതോടെ ആളുകള്‍ മീന്‍ ഉപയോഗം കുറച്ചതും പച്ചക്കറിയുടെ വില വർധിക്കാൻ കാരണമായി. നാട്ടിന്‍പുറങ്ങളിലെ പച്ചക്കറി വിലയുടെ അത്ര വര്‍ധനവ് തിരുവനന്തപുരത്തെ ചാല മാര്‍ക്കറ്റ്, കോഴിക്കോട്ടെ പാളയം മാര്‍ക്കറ്റ് എന്നിവിടങ്ങളിൽ ഇല്ല.