പണം തട്ടിയതായി തെളിഞ്ഞാൽ ജീവത്യാഗം ചെയ്യും; വെള്ളാപ്പള്ളി

ആലപ്പുഴ: മൈക്രോ ഫിനാന്‍സ് പദ്ധതിയില്‍ നിന്ന് ഒരു രൂപയെങ്കിലും താന്‍ തട്ടിയെടുത്തുവെന്നു തെളിഞ്ഞാല്‍ പൊതുപ്രവര്‍ത്തനം അവസാനിപ്പിച്ചു ജീവത്യാഗം ചെയ്യുമെന്ന് എസ്‌എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍.

"മൈക്രോഫിനാന്‍സ് തട്ടിപ്പില്‍ വിജിലന്‍സിന് കേസെടുക്കാന്‍ കഴിയില്ല. ഇക്കാര്യത്തില്‍ മുഖ്യമന്ത്രിയെ നേരില്‍ കണ്ട് കാര്യങ്ങള്‍ വിശദീകരിക്കും. സര്‍ക്കാരില്‍ നിന്നും നീതി കിട്ടുമെന്ന് കരുതുന്നതായും അദേഹം പറഞ്ഞു. മൈക്രോഫിനാന്‍സിനെ തകര്‍ക്കാനുള്ള നീക്കങ്ങള്‍ക്കെതിരെ നടത്താനിരുന്ന പ്രക്ഷോഭപരിപാടികള്‍ വേണ്ടെന്നു വച്ചതായും" വെള്ളാപ്പള്ളി അറിയിച്ചു.


മൈക്രോ ഫിനാന്‍സ് പദ്ധതി അട്ടിമറിക്കാനുള്ള നീക്കത്തിനെതിരെ ജില്ലയിലെ എസ്‌എന്‍ഡിപി യൂണിയനുകളുടെ നേതൃത്വത്തില്‍ നടത്തിയ വിശദീകരണ സമ്മേളനം ഉദ്ഘാടനം ചെയ്യുകയായിരുന്നു. തെറ്റിദ്ധാരണയുടെ പുറത്താണ് വി.എസ് മൈക്രോഫിനാന്‍സിനെതിരെ കേസിന് പോയത്. മൈക്രോഫിനാന്‍സുമായി ബന്ധപ്പെട്ട ആരോപണങ്ങള്‍ക്ക് പിന്നില്‍ ദുഷ്ടശക്തികളാണെന്നും വെള്ളാപ്പള്ളി ആരോപിച്ചു.