രണ്ട് ദിവസത്തെ സന്ദർശനത്തിനായി വെങ്കയ്യ നായിഡു ഇന്ന് കേരളത്തില്‍

തിരുവനന്തപുരം: രണ്ട് ദിവസത്തെ കേരള സന്ദര്‍ശനത്തിനായി ഉപരാഷ്ട്രപതി വെങ്കയ്യ നായിഡു വെള്ളിയാഴ്ച തലസ്ഥാനത്തെത്തും. രാവിലെ 10.45ന് ശംഖുമുഖം വ്യോമസേന ടെക്‌നിക്കല്‍ ഏരിയയില്‍ എത്തുന്ന ഉപരാഷ്ട്രപതിയെ ഗവര്‍ണ്ണര്‍, മുഖ്യമന്ത്രി എന്നിവരടങ്ങുന്ന സംഘം സ്വീകരിക്കും. തുടർന്ന് റോഡ് മാർഗം രാജ്ഭവനിലേക്ക് പോകും. അവിടെ അദ്ദേഹം സന്ദർശകരുമായി കൂടിക്കാഴ്ച നടത്തും.

തുടർന്ന് വൈകീട്ട് 3.30ന് കനകക്കുന്ന് കൊട്ടാരത്തില്‍ നടക്കുന്ന ശ്രീ ചിത്തിര തിരുനാള്‍ അനുസ്മരണ പരിപാടിയില്‍ മുഖ്യ പ്രഭാഷണം നടത്തും. വൈകുന്നേരം അഞ്ചുമണിയോടെ കോഴിക്കോട്ടേക്ക് തിരിക്കുന്ന ഉപരാഷ്ട്രപതി മറ്റന്നാള്‍ കോഴിക്കോട് നടക്കുന്ന രണ്ട് ചടങ്ങുകളില്‍ പങ്കെടുക്കും. പിന്നീട് 17 ന് വൈകുന്നേരത്തോടെ അദ്ദേഹം ഡൽഹിക്ക് മടങ്ങും. ഉപരാഷ്ട്രപതിയുടെ സന്ദര്‍ശനം പ്രമാണിച്ച് തിരുവനന്തപുരം നഗരത്തില്‍ കനത്ത സുരക്ഷയും ഗതാഗത നിയന്ത്രണവും ഏര്‍പ്പെടുത്തിയിട്ടുണ്ട്.