ബ്രാൻഡഡ് പച്ചക്കറികള്‍ വിപണിയിലെത്തിക്കാൻ വിഎഫ്‍‍പിസികെ

കൊട്ടാരക്കര: സംസ്ഥാനസര്‍ക്കാരിന്‍റെ ബ്രാൻഡഡ് പച്ചക്കറിക്കടകളും വരുന്നു. സംസ്ഥാനത്തു നിന്നുള്ള കാര്‍ഷികോത്പന്നങ്ങള്‍ തളിര്‍ എന്ന ബ്രാൻഡിൽ വിപണിയിൽ എത്തിക്കാൻ വെജിറ്റബിള്‍ ആന്‍റ് ഫ്രൂട്ട് പ്രൊമോഷൻ കൗൺസിൽ (വിഎഫ്‍‍പിസികെ) ആണ് തയ്യാറെടുക്കുന്നത്. ഇതിന്‍റെ ഭാഗമായി എല്ലാ ജില്ലകളിലും വിപണനകേന്ദ്രങ്ങള്‍ തുറക്കും.

പദ്ധതിയുടെ ഭാഗമായുള്ള ആദ്യ ഔട്ട്ലെറ്റ് ചൊവ്വാഴ്ചയാണ് തുറക്കുന്നത്. ചൊവ്വാഴ്ചയാണ് ആദ്യ തളി‍ര്‍ ഔട്ട്ലെറ്റിന്‍റെ ഉദ്ഘാടനം. ശീതീകരണസംവിധാനത്തോടുകൂടിയതാണ് ഔട്ട്ലെറ്റ്. അതതുജില്ലകളിലെ വിഎഫ്പിസികെ വിപണനകേന്ദ്രങ്ങളിൽ നിന്ന് പച്ചക്കറിയും പഴങ്ങളും ശേഖരിച്ചായിരിക്കും വിപണനം നടത്തുക. പ്രാദേശികവിപണിയിൽ ലഭ്യമല്ലാത്തവ ഹോര്‍ട്ടികോര്‍പ് വഴി പൊതുവിപണിയിൽ നിന്ന് ശേഖരിക്കും. പച്ചക്കറികളോടൊപ്പം സര്‍ക്കാര്‍ ബ്രാൻഡുകളായ മിൽമ, ഓയിൽപാം ഇന്ത്യ, കെപ്കോ (ചിക്കൻ), കേരഫെഡ് എന്നിവയുടെ ഉത്പന്നങ്ങളും ഔട്ട്ലെറ്റുകളിൽ ലഭ്യമാകും.

കൊല്ലം ജില്ലയിലെ കടപ്പാക്കടയിലും തുടര്‍ന്ന് തിരുവനന്തപുരത്തും തൃശൂരിലും ഔട്ട്ലെറ്റുകള്‍ തുറക്കാനാണ് പദ്ധതി. പച്ചക്കറികള്‍ തളിര്‍ ബ്രാൻഡിൽ റെഡി ടു കുക്ക് രൂപത്തിലും വിൽപനയ്ക്കെത്തിക്കാൻ പദ്ധതിയുണ്ട്.