ടോം ജോസിനെതിരായ കേസ് അവസാനിപ്പിക്കാൻ വിജിലൻസ്

മൂവാറ്റുപുഴ: അഡീഷണൽ ചീഫ് സെക്രട്ടറി ടോം ജോസിനെതിരായ കേസ് അവസാനിപ്പിക്കാൻ വിജിലൻസ് ഒരുങ്ങുന്നു. ടോം ജോസിന് കുടുംബപരമായ ആസ്തിയുണ്ടെന്നും അനധികൃതസ്വത്തില്ലെന്നും പറയുന്ന റിപ്പോര്‍ട്ട് മുവാറ്റുപുഴ വിജിലൻസ് കോടതിയിൽ സമര്‍പ്പിച്ചു. ജേക്കബ് തോമസ് ഡയറക്ടറായിരിക്കേയാണ് വിജിലൻസ് ടോം ജോസിനെതിരെ കേസെടുത്തത്.

അനധികൃത സ്വത്തിലൂടെ മഹാരാഷ്ട്രയിൽ 1.63 കോടി രൂപയുടെ ഭൂമി വാങ്ങിയെന്നായിരുന്നു ടോം ജോസിനെതിരായ ആരോപണം. 2010 ജനുവരി മുതൽ 2016 സെപ്റ്റംബര്‍ വരെയുള്ള കാലയളവിൽ കണക്കിൽപ്പെടാത്ത 1.91 കോടി രൂപവരുന്ന അധിക സ്വത്തു സമ്പാദിച്ചെന്നായിരുന്നു വിജിലൻസ് എഫ്ഐആറിൽ പറഞ്ഞത്. യഥാര്‍ത്ഥ വരുമാനത്തെക്കാള്‍ 62.35 ശതമാനം അധികം സ്വത്ത് ടോം ജോസ് സമ്പാദിച്ചെന്നായിരുന്നു പ്രഥമവിവരറിപ്പോര്‍ട്ടിൽ പറഞ്ഞിരുന്നത്.