പിടിച്ചെടുത്ത രേഖകളുടെ പരിശോധന ഇന്ന് തുടങ്ങും

കൊച്ചി: മുന്‍ മന്ത്രി കെ. ബാബുവിനെതിരെ നടന്ന വിജിലന്‍സ് റെയ്ഡില്‍ പിടിച്ചെടുത്ത രേഖകളുടെ പരിശോധന ഇന്നാരംഭിക്കും. രേഖകള്‍ വിജിലന്‍സ് കോടതിയില്‍ ഹാജരാക്കി തുടര്‍പരിശോധന വേണ്ടവ കസ്റ്റഡിയില്‍ വാങ്ങിയശേഷമായിരിക്കും പരിശോധന ആരംഭിക്കുക. നൂറിലധികം രേഖകള്‍ പിടിച്ചെടുത്തതായാണ് സൂചന.

30ഓളം രേഖകള്‍ ബാബുവിന്‍െറ വീട്ടില്‍നിന്നും ബാബുറാമിന്‍െറ വീട്ടില്‍നിന്ന് 85ഓളം രേഖകളും പിടിച്ചെടുത്തിരുന്നു. രേഖകള്‍ പരിശോധിച്ച ശേഷം മാത്രമേ ചോദ്യംചെയ്യലും തുടരന്വേഷണവും ആരംഭിക്കൂ.
എസ്ബിടി തൃപ്പൂണിത്തുറ ശാഖയില്‍ ബാബുവിന്‍െറയും മകളുടെയും പേരിലുള്ള അഞ്ച് അക്കൗണ്ടുകള്‍ മരവിപ്പിക്കാനുള്ള നടപടികള്‍ പൂര്‍ത്തിയായി. അക്കൗണ്ടുകളിലൂടെ നടന്ന പണമിടപാടുകളുടെ വിശദാംശങ്ങളും ശേഖരിച്ചു വരുന്നു.