വിഎം സുധീരന്‍: കോണ്‍ഗ്രസിലെ ആദര്‍ശത്തിന്‍റെ മുഖം

തിരുവനന്തപുരം: സംസ്ഥാന കോണ്‍ഗ്രസിലെ സംശുദ്ധതയുടെ മുഖമാണ് വിഎം സുധീരന്‍. സ്വന്തം പാര്‍ട്ടിയിലെ പ്രശ്‍നങ്ങള്‍ ചൂണ്ടിക്കാണിക്കുകയും വിമര്‍ശിക്കുകയും ചെയ്യുന്ന നേതാവ്. തന്‍റെ സംശുദ്ധമായ രാഷ്ട്രീയപ്രവര്‍ത്തനംകൊണ്ട് ജനമനസ്സുകളില്‍ ഇടംപിടിച്ച നേതാവാണ് മൂന്നു വര്‍ഷം സംസ്ഥാനത്തെ കോണ്‍ഗ്രസിനെ നയിച്ചശേഷം പടിയിറങ്ങുന്നത്.

കെഎസ്‍യു പ്രവര്‍ത്തകനായാണ് തൃശൂര്‍ അന്തിക്കാട് പാടിയം സ്വദേശിയായ വിഎം സുധീരന്‍ രാഷ്ട്രീയത്തിലെത്തുന്നത്. 1971ല്‍ കെഎസ്‍യു പ്രസിഡന്‍റും 75ല്‍ യൂത്ത് കോണ്‍ഗ്രസ് പ്രസിഡന്‍റുമായി. 1977ല്‍ ആലപ്പുഴയില്‍നിന്ന് ലോക്‍സഭയിലേക്ക് തെരഞ്ഞെടുക്കപ്പെടുമ്പോള്‍ പ്രായം വെറും 29. പിന്നീട് എംഎല്‍എയും മന്ത്രിയും നിയമസഭാ സ്‍പീക്കറുമായി.

അധികാരരാഷ്ട്രീയത്തിന് അടിപ്പെടാതെ പൊതുപ്രവര്‍ത്തനം മുന്നോട്ടു കൊണ്ടുപോകാനാകുമെന്ന് തെളിയിച്ച ചുരുക്കം ചില നേതാക്കന്മാരില്‍ ഒരാളാണ് സുധീരന്‍. 2009ല്‍ തെരഞ്ഞെടുപ്പില്‍ മത്സരിക്കാനില്ലെന്ന നിലപാടിനു പിന്നിലും ഈ ആദര്‍ശമായിരുന്നു. പാര്‍ട്ടിയില്‍നിന്ന് സമ്മര്‍ദ്ദം ഉണ്ടായിട്ടും യുവാക്കള്‍ക്ക് അവസരം നല്‍കണമെന്നുപറഞ്ഞ് സുധീരന്‍ 2009ല്‍ മത്സരിച്ചില്ല. മുഖ്യമന്ത്രിയായിരുന്ന ഉമ്മന്‍ ചാണ്ടിക്കും മുന്‍ കെപിസിസി പ്രസിഡന്‍റ് രമേശ് ചെന്നിത്തലയ്ക്കും താല്‍പര്യം ഇല്ലാതിരുന്നിട്ടുകൂടി സുധീരന് സംസ്ഥാന കോണ്‍ഗ്രസിന്‍റെ കടിഞ്ഞാൺ ദേശീയ നേത‍ൃത്വം കൈമാറിയതും ഈ ആദര്‍ശനിഷ്‍ഠകൊണ്ടാണ്.

എന്നാല്‍ സുധീരന്‍ കെപിസിസി പ്രസിഡന്‍റായിരുന്ന കാലം കേരളത്തിലെ കോണ്‍ഗ്രസ് പാര്‍ട്ടിക്ക് അത്ര നല്ലതായിരുന്നില്ല. സ്ഥാനമേറ്റതിനു പിന്നാലെ വന്ന ലോക്‍സഭാ തെരഞ്ഞെടുപ്പിലും തദ്ദേശസ്വയംഭരണ തെരഞ്ഞെടുപ്പിലും കാര്യമായ നഷ്‍ടമുണ്ടായി. മദ്യനയം സംബന്ധിച്ച സുധീരന്‍റെ നിലപാടും അതിനെ ഏതിരിടാന്‍ മുഖ്യമന്ത്രി ഉമ്മന്‍ ചാണ്ടി സ്വീകരിച്ച നിലപാടുകളും അതിനെത്തുടര്‍ന്നുണ്ടായ വിവാദങ്ങളും കോണ്‍ഗ്രസിനെയും യുഡിഎഫിനെയും മുന്‍പെങ്ങുമില്ലാത്ത പ്രതിസന്ധിയിലേക്കാണ് കൊണ്ടെത്തിച്ചത്. ഇവയുടെയെല്ലാം ഫലമായി 2016ലെ അസംബ്ലി തെരഞ്ഞെടുപ്പില്‍ പാര്‍ട്ടി തകര്‍ന്നടിഞ്ഞു. ഇങ്ങനെ കേന്ദ്രത്തിലെയും സംസ്ഥാനത്തെയും ഭരണം നഷ്‍ടപ്പെട്ട് പ്രതിസന്ധിയില്‍ നില്‍ക്കുമ്പോളാണ് സുധീരന്‍റെ അപ്രതീക്ഷിത രാജി പ്രഖ്യാപനം.

VM Sudheeran, a selfless political leader

VM Sudheeran is a widely accepted leader for his political correctness.