വിഎസിന്റെ പരാതിയില്‍ വിശദീകരണവുമായി സര്‍ക്കാര്‍

തിരുവനന്തപുരം: ഭരണ പരിഷ്‌കാര കമ്മിഷനോടുള്ള സര്‍ക്കാര്‍ സമീപനത്തില്‍ അതൃപ്തി അറിയിച്ചുള്ള വിഎസ് അച്യുതാനന്ദന്റെ പരാതിയില്‍ മറുപടിയുമായി സര്‍ക്കാര്‍. ഭരണപരിഷ്‌കാര കമ്മീഷന്‍ രൂപീകരിച്ചിട്ടും തുടര്‍നടപടികള്‍ സ്വീകരിക്കാത്തതില്‍ അതൃപ്തി അറിയിച്ച് ചീഫ് സെക്രട്ടറിക്ക് വിഎസ് കത്തയച്ചിരുന്നു. വിഎസിനെ സെക്രട്ടേറിയറ്റ് അനക്‌സില്‍ ഇരുത്തുന്നത് അനൗചിത്യമാണെന്നും മുന്‍ മുഖ്യമന്ത്രി ആയതുകൊണ്ടാണ് മെച്ചപ്പെട്ട ഓഫീസ് അനുവദിച്ചതെന്നും സര്‍ക്കാര്‍ വ്യക്തമാക്കി. വിഎസിന്റെ സൗകര്യം പരിഗണിച്ചാണ് ഐജിഎമ്മില്‍ ഓഫീസ് അനുവദിച്ചത്. മന്ത്രിമാരുടേതിന് തുല്യമായ വീടും സൗകര്യങ്ങളും ഉടന്‍ നല്‍കുമെന്നും സര്‍ക്കാര്‍ അറിയിച്ചു.


സെക്രട്ടറിയേറ്റ് അനക്‌സിലോ കമ്മീഷന്‍ ഓഫീസ് അനുവദിക്കണമെന്നായിരുന്നു വിഎസ് നേരത്തെ ആവശ്യപ്പെട്ടത്. കവടിയാര്‍ ഹൗസ് ഔദ്യോഗിക വസതിയായി നല്‍കണമെന്നും വിഎസ് ആവശ്യപ്പെട്ടിരുന്നു. എന്നാല്‍ ഇത് രണ്ടും അംഗീകരിക്കാത്തതിനെ തുടര്‍ന്നാണ് അതൃപ്തി പരസ്യമാക്കി വിഎസ് രംഗത്തെത്തിയിരിക്കുന്നത്.


കമ്മിഷന്‍ അധ്യക്ഷ സ്ഥാനം ഏറ്റെടുക്കാമെന്ന് കാണിച്ച് ഓഗസ്റ്റ് 18ന് താന്‍ കത്തു നല്‍കിയെന്നത് ശരിയാണ്. എന്നാല്‍ കമ്മിഷന് വേണ്ട ഓഫീസോ മറ്റു കാര്യങ്ങളോ അറിയിച്ചിരുന്നില്ല. ഭരണപരിഷ്‌കാര കമ്മിഷനെ സര്‍ക്കാര്‍ അവഹേളിക്കുകയാണ്. കമ്മിഷനെ കാര്യങ്ങള്‍ അറിയിക്കുന്നില്ല. ആവശ്യപ്പെട്ട ഔദ്യോഗിക വസതി അനുവദിക്കാത്തിലും കത്തില്‍ അമര്‍ഷം രേഖപ്പെടുത്തുന്നുണ്ട്.

എന്തു കൊണ്ടാണ് ചുമതലയേറ്റെടുക്കാത്തതെന്ന മാധ്യമ പ്രവര്‍ത്തകരുടെ ചോദ്യത്തിന് അത് പ്രഖ്യാപിച്ചവരോടു തന്നെ ചോദിക്കണം. അവരാണ് വിശദമാക്കേണ്ടത്. നിങ്ങള്‍ അവരെ തന്നെ സമീപിക്കുക എന്നായിരുന്നു ഇന്നലെ വി.എസ് പ്രതികരിച്ചത്