എംഎൽക്കെതിരായ പീഡന പരാതി: നടപടി വേണമെന്ന് വിഎസ്

തിരുവനന്തപുരം: പി.കെ.ശശി എംഎൽഎക്കെതിരെ ഉയർന്ന പീഡന പരാതിയിൽ നടപടി വേണമെന്ന് വി.എസ് അച്യുതാനന്ദൻ. സംഘടനാ നടപടി ആവശ്യമാണെന്ന് കാണിച്ച് വി.എസ് സിപിഎം ദേശീയ ജനറൽ സെക്രട്ടറി സീതാറാം യെച്ചൂരിക്ക് കത്തയച്ചു. പാർട്ടി സ്ത്രീ സംരക്ഷണം ഉറപ്പാക്കണമെന്ന് വിഎസ് ആവശ്യപ്പെട്ടു. ദേശീയ വനിതാ കമ്മീഷൻ ഇന്ന് പി.കെ.ശശി എംഎൽഎയുടെ രാജി ആവശ്യപ്പെട്ടിരുന്നു.

പെൺകുട്ടി പോലീസിൽ പരാതിപ്പെട്ടാൽ പിന്തുണക്കുമെന്ന് വൃന്ദ കാരാട്ട് പ്രതികരിച്ചു. സിപിഎം സംസ്ഥാന കൗൺസിൽ എ.കെ. ബാലൻ, പി.കെ.ശ്രീമതി ടീച്ചർ എന്നിവരെ പരാതി അന്വേഷിക്കാൻ നിയോഗിച്ചു. ഡിവൈഎഫ്ഐ പ്രവർത്തകയായ പെൺകുട്ടി നൽകിയ പരാതി പൂഴ്ത്തിവെച്ചിട്ടില്ലെന്ന് എസ്.രാമചന്ദ്രൻ പിള്ള വ്യക്തമാക്കിയിരുന്നു. പെൺകുട്ടിയുടെ പരാതിയിൽ ദേശീയ വനിതാ കമ്മീഷൻ സ്വമേധയാ കേസെടുത്തു. ഇതിനിടെയാണ് പാർട്ടി സ്ത്രീ സുരക്ഷ ഉറപ്പാക്കണമെന്ന് ആവശ്യപ്പെട്ട് വിഎസ് കത്ത് നൽകിയത്. കേന്ദ്ര നേതൃത്വത്തിന്റെ മേൽനോട്ടത്തിൽ അന്വേഷണം നടത്തണമെന്നും വിഎസ് ആവശ്യപ്പെട്ടു.