മന്ത്രി ചന്ദ്രശേഖരൻ കൊല്ലപ്പെട്ടവരുടെ വീട് സന്ദർശിച്ചതിൽ തെറ്റില്ല: വി.എസ്.സുനിൽകുമാർ

തൃശ്ശൂർ: കാസർഗോഡ് കൊല്ലപ്പെട്ട യൂത്ത് കോൺഗ്രസ് പ്രവർത്തകരുടെ വീടുകൾ മന്ത്രി ഇ.ചന്ദ്രേശഖരൻ സന്ദർശിച്ചതിൽ തെറ്റില്ലെന്ന് മന്ത്രി വി.എസ്.സുനിൽകുമാർ. കുടുംബം സിബിഐ അന്വേഷണം ആവശ്യപ്പെട്ടതിലും തെറ്റില്ലെന്നും മന്ത്രി കൂട്ടിച്ചേർത്തു.

കഴിഞ്ഞ ദിവസമാണ് ഇ.ചന്ദ്രശേഖരൻ കൊല്ലപ്പട്ടെ കൃപേഷിൻെറയും ശരത് ലാലിൻെറയും വീട് സന്ദർശിച്ചത്. പൊതുപ്രവർത്തകൻ എന്ന നിലയിൽ ഇത് തൻെറ കടമയാണ്. ഇക്കാര്യത്തിൽ ആര് വിമർശിച്ചാലും കുഴപ്പമില്ലെന്ന് മന്ത്രി ചന്ദ്രശേഖരൻ പറഞ്ഞു.

കൊലപാതക രാഷ്ട്രീയത്തിൻെറ പേരിൽ സിപിഎമ്മിനെ ഒറ്റപ്പെടുത്താനാണ് ശ്രമം നടക്കുന്നതെന്നും സുനിൽ കുമാർ പറഞ്ഞു. വ്യാഴാഴ്ച രാവിലെയാണ് റവന്യൂ മന്ത്രി ഇ.ചന്ദ്രശേഖരൻ കൊല്ലപ്പെട്ടവരുടെ വീടുകൾ സന്ദർശിച്ചത്. രണ്ട് കുടുംബങ്ങളെയും മന്ത്രി ആശ്വസിപ്പിച്ചു.

ചന്ദ്രശേഖരൻെറ സന്ദർശനത്തിൽ അസ്വാഭാവികമായി ഒന്നുമില്ലെന്ന് മന്ത്രി ഇപി ജയരാജൻ പ്രതികരിച്ചിരുന്നു. ജില്ലയിലെ മന്ത്രി എന്ന നിലയിൽ അത് സ്വാഭാവിക നടപടിയാണെന്ന് സിപിഐ സംസ്ഥാന സെക്രട്ടറി കാനം രാജേന്ദ്രനും പറഞ്ഞു.