മത്സ്യത്തൊഴിലാളികൾ ജാഗ്രത പാലിക്കണമെന്ന് മുന്നറിയിപ്പ്

തിരുവനന്തപുരം: കടലിൽ പോകുന്ന മത്സത്തൊഴിലാളികൾക്ക് ജാഗ്രതാ നിർദേശം. ഇന്ന് രാത്രി കൂടി വേഗത്തിൽ കാറ്റ് വീശാൻ സാധ്യതയുണ്ടെന്നാണ് മുന്നറിയിപ്പ്.

വടക്കന്‍ തമിഴ്‌നാട്, പുതുച്ചേരി തീരത്തു തെക്ക്,തെക്കുപടിഞ്ഞാറ് ദിശയില്‍ മണിക്കൂറില്‍ 35 - 45 കിലോ മീറ്റർ വേഗതയിലും തെക്കന്‍ തമിഴ്‌നാട് തീരത്ത് തെക്കു പടിഞ്ഞാറ് ദിശയില്‍ മണിക്കൂറില്‍ 35-45 കിലോ മീറ്റർ വേഗതയിലും ചില അവസരങ്ങളില്‍ മണിക്കൂറില്‍ 50-55 കിലോ മീറ്റർ വേഗതയിലും കാറ്റു വീശാന്‍ സാധ്യതയുണ്ട്. കേന്ദ്ര കാലാവസ്ഥ വകുപ്പാണ് അറിയിപ്പ് പുറപ്പെടുവിച്ചത്.

തെക്ക് തമിഴ്നാട് തീരം മുതല്‍ കൊളച്ചല്‍, ധനുഷ്‌കോടി വരെ ഇന്നലെ ഉച്ചയ്ക്ക് 2.30 മുതല്‍ മെയ് ഒന്‍പതിന് രാത്രി 11.30 വരെ 2.3 മീറ്റര്‍ മുതല്‍ 2.6 മീറ്റര്‍ വരെ ഉയരത്തില്‍ തിരമാലകള്‍ ഉണ്ടാകുവാന്‍ സാധ്യതയുണ്ടെന്ന് ദേശീയ സമുദ്ര സ്ഥിതി പഠന കേന്ദ്രവും (ഇന്‍കോയിസ്) അറിയിച്ചു. മത്സ്യത്തൊഴിലാളികള്‍ ഇന്ന് രാത്രി കൂടി മത്സ്യ ബന്ധനത്തിന് പോകരുതെന്ന് കാലാവസ്ഥാ കേന്ദ്രം മുന്നറിയിപ്പ് നൽകി.