ബംഗാൾ ഉൾക്കടലില്‍ അതിതീവ്ര ന്യൂനമർദം; ജാഗ്രതാ നിര്‍ദ്ദേശം

തിരുവനന്തപുരം: ബംഗാള്‍ ഉള്‍ക്കടലില്‍ അതിതീവ്ര ന്യൂനമർദം രൂപപ്പെടുന്നതിനെ തുടര്‍ന്ന് മത്സ്യ തൊഴിലാളികള്‍ക്ക് ജാഗ്രതാ നിര്‍ദ്ദേശം. അടുത്ത മൂന്ന് ദിവസത്തേക്ക് ബംഗാള്‍ ഉള്‍ക്കടലില്‍ പോകുന്നത് ഒഴിവാക്കണം. മത്സ്യ ബന്ധനത്തിനു പോയവര്‍ ഉടന്‍ തിരിച്ചെത്തണമെന്നും കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.

ബംഗാൾ ഉൾക്കടലിലെ അതിതീവ്ര ന്യൂനമർദം കഴിഞ്ഞ 6 മണിക്കൂറിൽ പടിഞ്ഞാറ് - വടക്കു പടിഞ്ഞാറ് ദിശയിൽ മണിക്കൂറിൽ 13 കിലോമീറ്റർ വേഗതയിൽ സഞ്ചരിച്ചുകൊണ്ടിരിക്കുകയാണ്. ഇത് അടുത്ത 24 മണിക്കൂറിൽ ചുഴലിക്കാറ്റായി മാറാനും തുടർന്നുള്ള 24 മണിക്കൂറിൽ അതിതീവ്ര ചുഴലിക്കാറ്റായി മാറാനും സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി.

ഡിസംബർ 15, 16, 17 തീയതികളിൽ കടൽ പ്രക്ഷുബ്‍ദമായിരിക്കും. ഈ തിയ്യതികളില്‍ മത്സ്യബന്ധനത്തിന് പോകുവാൻ പാടുള്ളതല്ല. ആന്ധ്രാ, തമിഴ്നാട് ,പുതുച്ചേരി തീരങ്ങളില്‍ ശക്തമായ കാറ്റുവീശാന്‍ സാധ്യതയുണ്ടെന്നും കേന്ദ്രം അറിയിച്ചു.