ഇടുക്കിയിൽ ജലനിരപ്പ് താഴുന്നു; പെരിയാര്‍ നിറഞ്ഞൊഴുകുന്നു

ചെറുതോണി: വൃഷ്ടിപ്രദേശത്ത് മഴകുറഞ്ഞതോടെ ഇടുക്കി ഡാമിലെ ജലനിരപ്പിൽ നേരിയ കുറവ്. ചെറുതോണി ഡാമിന്‍റെ അഞ്ച് ഷട്ടറുകള്‍ തുറന്നിട്ടും ജലനിരപ്പ് കുറയാത്ത അവസ്ഥ ആശങ്ക സൃഷ്ടിച്ചിരുന്നു. എന്നാൽ ഇന്നലെ രാത്രിയോടെയാണ് ഡാമിലെ ജലനിരപ്പ് കുറയാൻ ആരംഭിച്ചത്. 2401.04 അടിയാണ് നിലവിൽ ഡാമിലെ ജലനിരപ്പ്.

ഇന്നലെ രാത്രി പത്തുമണിയോടെ 2401.60 ആയിരുന്നു ഡാമിലെ ജലനിരപ്പ്. അതേസമയം, ജലനിരപ്പ് 2400 എങ്കിലും എത്താതെ ഡാമിന്‍റെ ഷട്ടറുകള്‍ അടയ്ക്കില്ലെന്ന് വൈദ്യുതി ബോര്‍ഡ് അറിയിച്ചിട്ടുണ്ട്. നിലവിൽ സെക്കൻഡിൽ 750 ക്യൂബിക് മീറ്റര്‍ വെള്ളമാണ് ‍ഡാമിൽ നിന്ന് പുറത്തേയ്ക്ക് ഒഴുക്കുന്നത്.

അതേസമയം, പ്രതീക്ഷിച്ചത്ര നീരൊഴുക്ക് ഇല്ലാത്തതുമൂലം ആലുവയിൽ സ്ഥിതി നിയന്ത്രണവിധേയമാണ്. ആലുവപ്പുഴയുടെ പരിസരപ്രദേശങ്ങളിൽ വിവിധ സേനകള്‍ രക്ഷാപ്രവര്‍ത്തനത്തിന് തയ്യാറായി നിലകൊള്ളുന്നുണ്ട്. നീരൊഴുക്ക് കുറഞ്ഞതോടെ ഭൂതത്താൻകെട്ട് ഡാമിലും ജലനിരപ്പ് ഒരടി താഴ്ന്നു.