Idukki Dam: 2 ഷട്ടറുകള്‍കൂടി തുറന്നു; സെക്കന്‍റില്‍ 1,25,000 ലിറ്റര്‍ വെള്ളം

ഇടുക്കി: ഇടുക്കി ചെറുതോണി അണക്കെട്ടിന്റെ രണ്ടു ഷട്ടറുകൾ കൂടി ഇന്ന് തുറന്നു. ഇന്നലെ ട്രയല്‍ റണ്ണിനായി മൂന്നാമത്തെ ഷട്ടര്‍ തുറന്നിട്ടും അണക്കെട്ടിലെ ജലനിരപ്പ് കുറയാത്ത സാഹചര്യത്തിലാണ് ഇന്ന് പുലര്‍ച്ചെ 7ന് 2,4 ഷട്ടറുകള്‍ കൂടി തുറന്നത്. 40 സെന്റി മീറ്ററാണ് ഷട്ടറുകൾ തുറന്നിരിക്കുന്നത്.

സെക്കൻഡിൽ ഒന്നേകാൽ ലക്ഷം ലീറ്റർ (125 ക്യുമെക്സ്) വെള്ളമാണ് പുറത്തേക്കു വിടുന്നത്. കനത്ത മഴയും ശക്തമായ നീരൊഴുക്കും ഇടുക്കിയിൽ തുടരുന്ന സാഹചര്യത്തിലാണ് കൂടുതൽ വെള്ളം പുറത്തേക്കു വിടുന്നത്. അർധരാത്രിക്ക് 2400.38 അടിയായിരുന്നു ഡാമിലെ ജലനിരപ്പ്. ഇന്ന് രാവിലെ ഏഴിന് ജലനിരപ്പ് 2401 അടിയായി. ഇതോടെയാണ് രണ്ട് ഷട്ടറുകള്‍ കൂടി തുറന്നത്. വൈകാതെ 2 ഷട്ടറുകള്‍ കൂടി തുറക്കാനാണ് സാധ്യത. അണക്കെട്ടിലേക്കുള്ള നീഴൊഴുക്കു തുടരുന്ന സാഹചര്യത്തിൽ കെഎസ്ഇബി ഇന്നലെത്തന്നെ അതീവ ജാഗ്രതാ നിർദേശം (റെഡ് അലർട്ട്) പുറപ്പടുവിച്ചിരുന്നു.

മിനിറ്റുകളുടെ വ്യത്യാസത്തിലാണ് രണ്ട് ഷട്ടറുകളും ഉയര്‍ത്തിയത്. 2403 അടിയായാണ് ഡാമിന്റെ പരമാവധി സംഭരണ ശേഷി. പെരിയാറില്‍ ജലനിരപ്പ് ഉയരുന്നതിനാല്‍ കൂടുതല്‍ പേരെ മാറ്റിപാര്‍പ്പിക്കും. റവന്യു മന്ത്രി വിളിച്ചുചേര്‍ത്ത അവലോകന യോഗം രാവിലെ 9 മണിക്ക് ചേരും.