​എഎംഎംഎയുടെ നിലപാടിൽ പ്രതീക്ഷയില്ലെന്ന് ഡബ്ല്യൂസിസി

കൊച്ചി: ഡബ്ല്യൂസിസി ഉന്നയിച്ച ചോദ്യങ്ങളിൽ നിന്ന് ശ്രദ്ധ തിരിക്കാനുള്ള ശ്രമമാണ് എഎംഎംഎ സെക്രട്ടറിയും നടനുമായ സിദ്ദിഖ് നടത്തുന്നതെന്ന് ഡബ്ല്യൂസിസി അംഗം നടി പാര്‍വതി തിരുവോത്ത്. എഎംഎംഎയുടെ നിലപാടിൽ പ്രതീക്ഷയില്ലെന്ന് പാര്‍വതി പറഞ്ഞു. ഇരയെയും കുറ്റാരോപിതനെയും ഒരേ തട്ടിൽ കാണരുതെന്നാണ് ഡബ്ല്യൂസിസിയുടെ നിലപാടെന്ന് പാര്‍വതി വ്യക്തമാക്കി.

എഎംഎംഎ പ്രസിഡന്‍റ് മോഹൻലാലിനെതിരെ വിമര്‍ശനം ഉന്നയിച്ചത് സംഘടനയിലെ അംഗങ്ങള്‍ എന്ന നിലയിലാണെന്നും എന്താണ് തെറ്റെന്ന് ചൂണ്ടിക്കാണിച്ചാൽ മാപ്പ് പറയാമെന്നും പാര്‍വതി പറഞ്ഞു. എഎംഎംഎയ്ക്കുള്ളിൽ തന്നെ ഭിന്നതയുണ്ടെന്നും സംഘടനയുടെ യഥാര്‍ഥ നിലപാട് എന്താണെന്ന് മനസ്സിലാകുന്നില്ലെന്നും പാര്‍വതി പറഞ്ഞു. സംഘടനയുടെ നിലപാട് എന്ന പേരിൽ പുറത്തുവരുന്നത് ആരുടെ നിലപാടാണെന്ന് സംശയമുണ്ടെന്നും പാര്‍വതി പറഞ്ഞു.

എഎംഎംഎയ്ക്കും പ്രസിഡന്‍റ് മോഹൻലാലിനുമെതിരെ തുറന്നടിച്ച ഡബ്ല്യൂസിസി അംഗങ്ങളായ നടിമാര്‍ക്കെതിരെ വിമര്‍ശനവുമായി സെക്രട്ടറി സിദ്ദിഖ് രംഗത്തുവന്നിരുന്നു. മോഹൻലാലിനെ വിമര്‍ശിച്ച നടിമാര്‍ക്കെതിരെ സംഘടന നടപടിയെടുക്കുമെന്നും സിദ്ദിഖ് പറഞ്ഞിരുന്നു.