പ്ലസ്‍‍ടുവിന് മികച്ച വിജയം: എന്നിട്ടും റഫ്‍‍സീന ആത്മഹത്യ ചെയ്തതെന്തിന്

കണ്ണൂർ: 'എന്‍റെ ജീവിതം എനിക്കുള്ളതാണെന്നും മറ്റാരും അതില്‍ ഇടപെടുന്നത് എനിക്കിഷ്ടമല്ലെന്നും' തുറന്നു പറഞ്ഞ കണ്ണൂരിലെ ആ പെൺകുട്ടി, പ്ലസ് ടു പരീക്ഷയില്‍ 1200 ല്‍ 1180 മാര്‍ക്ക് വാങ്ങി വിജയിച്ച മിടുക്കിയായ ആ റഫ്‍‍സീന ഇന്ന് ജീവിച്ചിരിപ്പില്ല. വളരെ സാധാരണമായിരുന്നു അവളുടെ കുടുംബപശ്ചാത്തലം. ഒരവസരത്തില്‍ അവളുടെ കുടുംബത്തിന്‍റെ ദയനീയാവസ്ഥ മാധ്യമങ്ങളിൽ അച്ചടിച്ചു വന്നിരുന്നു. തന്‍റെയും കുടുംബത്തിന്‍റെയും അവസ്ഥ ആരും അറിയരുതെന്ന് റഫ്‌സീനക്ക് നിര്‍ബന്ധമുണ്ടായിരുന്നു. അതിനാൽ തന്നെ ഒറ്റമുറിവീട്ടിനു മുന്നില്‍ അവൾ നിൽക്കുന്ന ചിത്രമടക്കം വാര്‍ത്ത പ്രസിദ്ധീകരിച്ചു വന്നതില്‍ അവൾ വളരെ അസ്വസ്ഥയായിരുന്നു. ഈ വിഷയത്തില്‍ മനംനൊന്താണ് കുട്ടി ജീവനൊടുക്കിയതെന്നാണ് ഇപ്പോൾ പുറത്തുവരുന്ന റിപ്പോര്‍ട്ടുകൾ സൂചിപ്പിക്കുന്നത്.

പരീക്ഷയില്‍ ഉന്നതവിജയം നേടിയ റഫ്‍‍സീനയെ ഇന്നലെയാണ് കണ്ണൂര്‍ മാലൂര്‍ നിട്ടാറമ്പിലെ ലക്ഷം വീട് കോളനിയിലെ വീട്ടില്‍ തൂങ്ങി മരിച്ച നിലയില്‍ കണ്ടെത്തിയത്. റഫ്‍‍സീന എഴുതിയതെന്ന് കരുതപ്പെടുന്ന കുറിപ്പും കണ്ടെടുത്തിട്ടുണ്ട്. 'എന്‍റെ ജീവിതം എനിക്കുള്ളതാണെന്നും ഞാന്‍ പറഞ്ഞത് ആരും ചെവിക്കൊണ്ടില്ലല്ലോ’ എന്നും അതില്‍ അവൾ കുറിച്ചിരിക്കുന്നെന്നും റിപ്പോര്‍ട്ടുകൾ പറയുന്നു.


(ചിത്രം കടപ്പാട്: ഏഷ്യാനെറ്റ്)

ശിവപുരം ഹയര്‍ സെക്കന്‍ഡറി സ്‌കൂളിലെ വിദ്യാര്‍ത്ഥിനി ആയിരുന്ന റഫ്‍‍സീന കൈവരിച്ച ഉന്നത വിജയത്തെത്തുടര്‍ന്ന് അദ്ധ്യാപകരും വിദ്യാര്‍ഥികളുമെല്ലാം ആശംസ അറിയിക്കാൻ വീട്ടിലെത്തിയിരുന്നു. ഇതിന് പിന്നാലെയാണ് കുട്ടി ആത്മഹത്യ ചെയ്തത്. കൂലിത്തൊഴിലാളിയാണ് റഫ്‍‍സീനയുടെ ഉമ്മ. അവര്‍ പണി കഴിഞ്ഞ് വീട്ടിലെത്തിയപ്പോൾ മകളെ മരിച്ച നിലയില്‍ കണ്ടെത്തുകയായിരുന്നു.

what is the reason behind rafseenas suicide

Kerala people searching for the reason of Rafseena's suicide in Kannur, She scored 1180 marks out of 1200 in her HSS Exam