വൈറലായി സെൽഫി
ആലുവ നഗരസഭയുടെ വൈസ് ചെയർപേഴ്സണായിരുന്ന ജെബി മേത്തറും മറ്റ് അംഗങ്ങളുമാണ് ദിലീപിനൊപ്പമുള്ള സെൽഫിയിലുളളത്. ഈ ചിത്രം ഉയർത്തിയാണ് സോഷ്യൽമീഡിയയിൽ വിമർശനം ഉയരുന്നത്. നേരത്തെ പരിപാടി നടന്ന വേളയിലും ദിലീപിനെ ചടങ്ങിൽ മുഖ്യാതിഥിയായി ക്ഷണിച്ചത് വിവാദമായിരുന്നു. ഇപ്പോൾ ജെബി മേത്തറിനെ രാജ്യസഭ സ്ഥാനാർഥിയായി പ്രഖ്യാപിച്ചതോടെ പഴയ ചിത്രം സോഷ്യൽ മീഡിയയിൽ വീണ്ടും വ്യാപകമായി പ്രചരിക്കുകയാണ്.
സ്ത്രീകൾക്കൊപ്പമോ, അക്രമികൾക്കൊപ്പമോ?
സഹപ്രവര്‍ത്തകയെ ബലാത്സംഗം ചെയ്യാൻ ക്വട്ടേഷൻ കൊടുത്ത കേസിൽ പ്രതിസ്ഥാനത്തുള്ള നടനെ ആഘോഷിക്കുന്ന വനിതയാണോ കോണ്‍ഗ്രസിന്‍റെ രാജ്യസഭ സ്ഥാനാർഥി എന്നാണ് ഉയരുന്ന പ്രധാന വിമര്‍ശനം. വനിതകൾക്ക് പ്രാധാന്യം നൽകിയാണ് കോൺഗ്രസ് മഹിളാ കോൺഗ്രസ് അധ്യക്ഷയെ സ്ഥാനാർഥിയാക്കിയതെന്ന് പാർട്ടി വൃത്തങ്ങൾ പറയുമ്പോഴാണ് ദിലീപിനെ പോലുള്ളവരെ ക്ഷണിച്ച് വേദിയിലിയിരുത്തുകയും അവർക്കൊപ്പം സെൽഫി എടുക്കുകയും ചെയ്യുന്ന നേതാവാണോ, സ്ത്രീകൾക്ക് വേണ്ടി നിലകൊള്ളുന്നതെന്ന ചോദ്യം ഉയരുന്നത്.
ലോഗോ പ്രകാശനം ചെയ്തത് ദിലീപ്
നടിയെ ആക്രമിച്ച കേസിൽ കുറ്റപത്രത്തിൽ പേര് വന്ന് വളരെ നാളുകൾക്ക് ശേഷം ദിലീപ് പങ്കെടുത്ത ആദ്യ പൊതു പരിപാടിയായിരുന്നു ആലുവ നഗരസഭയുടെ നൂറാം വാർഷികം. അന്ന് നഗരസഭയുടെ ഔദ്യോഗിക ലോഗോ പ്രകാശനം ചെയ്യിച്ചത് ദിലീപിനെക്കൊണ്ടായിരുന്നു. ഈ പരിപാടിയുടെ വാർത്ത പുറത്ത് വന്നപ്പോൾ തന്നെ സ്ത്രീകള്‍ക്ക് എതിരെയുള്ള അക്രമങ്ങളോട് കോണ്‍ഗ്രസ് നിലപാട് എന്താണെന്നും മഹിളാ കോണ്‍ഗ്രസിന്‍റെ നിലപാട് എന്താണെന്നും വ്യക്തമാക്കണമെന്ന് സോഷ്യൽ മീഡിയ ആവശ്യപ്പെട്ടിരുന്നു.
നീതിക്ക് വേണ്ടിയുള്ള യുദ്ധം
അന്ന് ചടങ്ങിൽ വച്ച് "താൻ നീതിക്കും സത്യത്തിനും വേണ്ടിയുള്ള യുദ്ധത്തിലാണ്. എല്ലാവരുടേയും പ്രാര്‍ത്ഥന എനിക്കൊപ്പമുണ്ടാകണമെന്ന് ആത്മാര്‍ത്ഥമായി ആഗ്രഹിക്കുന്നുവെന്ന്" ദിലീപ് പറഞ്ഞിരുന്നെന്നാണ് ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നത്. മുൻ കെപിസിസി പ്രസിഡന്‍റ് ടി ഒ ബാവയുടെ കൊച്ചു മകളും കോൺഗ്രസ് നേതാവായ കെഎംഐ മേത്തറുടെ മകളുമാണ് ജെബി മേത്തർ