പ്രോസിക്യൂഷന്‍ നടപടി നേരിടുമെന്ന് ഡിജിപി സെന്‍കുമാര്‍

തിരുവനന്തപുരം: തനിക്കെതിരെയുള്ള പ്രോസിക്യൂഷന്‍ നടപടിയെ നേരിടുമെന്ന് ഡിജിപി ടിപി സെന്‍കുമാര്‍. ശിഖണ്ഡിയെ കണ്ടാല്‍ പേടിക്കുന്ന ആളല്ല താനെന്നും ഭീഷ്‍മരെപ്പോലെ ആയുംധം താഴെ വെക്കില്ലെന്നും സെന്‍കുമാര്‍ പറഞ്ഞു.

പ്രോസിക്യൂഷന്‍ നടപടി സംബന്ധിച്ച് തനിക്ക് അറിയിപ്പൊന്നും ലഭിച്ചിട്ടില്ല. അറിയിപ്പ് ലഭിച്ചാല്‍ തുടര്‍നടപടികള്‍ കൈക്കൊള്ളും എന്നും സെന്‍കുമാര്‍ പറഞ്ഞു.

പോലീസ് ആസ്ഥാനത്തെ എഐജി വി ഗോപാല കൃഷ്‍ണന്‍ നാല് വര്‍ഷം മുന്‍പ് നല്‍കിയ പരാതിയിലാണ് നിയമ നടപടികള്‍ കൈക്കൊള്ളാന്‍ സര്‍ക്കാര്‍ ഇപ്പോള്‍ അനുമതി നല്‍കിയിരിക്കുന്നത്. സെന്‍കുമാര്‍ മനുഷ്യാവകാശ കമ്മീഷന്‍ ഐജി ആയിരിക്കുമ്പോള്‍ കീഴുദ്യോഗസ്ഥനായ തന്നെ മാനസികമായി പീഡിപ്പിക്കുകയും കോണ്‍ഫിഡന്‍ഷ്യല്‍ റിപ്പോര്‍ട്ടില്‍ മോശം പരാമര്‍ശം എഴുതിച്ചേര്‍ക്കുകയും ചെയ്‍തു എന്നായിരുന്നു പരാതി.

സെന്‍കുമാറും ഗോപാലകൃഷ്‍ണനും 10 വര്‍ഷത്തിലധികമായി പോരിലാണ്. സെന്‍കുമാറിനെതിരെ പ്രോസിക്യൂഷന്‍ നടപടിക്ക് അനുമതി വേണമെന്നാവശ്യപ്പെട്ട് 2006 മുതല്‍ ഗോപാലകൃഷ്‍ണന്‍ സര്‍ക്കാരിനെ സമീപിക്കുകയാണെങ്കിലും ഇപ്പോളാണ് അനുമതി ലഭിച്ചത്.

Will face prosecution: Senkumar

DGP TP Senkumar said that he will face prosecution on a complaint filed against him by AIG Gopal Krishnan.