മാപ്പ് പറയില്ല,മന്ത്രി സ്ഥാനം പോയാലും ശൈലി മാറ്റുകയുമില്ലെന്ന് മണി

തൊടുപുഴ: പൊമ്പിളൈ ഒരുമൈ പ്രവർത്തകരോട് താൻ മാപ്പ് പറയില്ല എന്ന് എം.എം.മണി. പാർട്ടി ആവശ്യപ്പെട്ടാൽ മാത്രമേ താൻ രാജി വെക്കുകയുള്ളുവെന്നും മണി പറഞ്ഞു. നിർവ്യാജമായ ഖേദം താൻ പൊതു സമൂഹത്തോട് പ്രകടിപ്പിച്ചു കഴിഞ്ഞു. ഒരുമൈ പ്രവർത്തകരെ അവിടെ ഇരുത്തിയവർ തന്നെ അവരെ തിരിച്ചു കൊണ്ട് പോകട്ടെയെന്നും മണി പ്രതികരിച്ചു.

മുഖ്യമന്ത്രിയും പാർട്ടി സെക്രട്ടറിയും ആവശ്യപ്പെട്ടിട്ടാണ് താൻ ഖേദം പ്രകടിപ്പിച്ചതെന്നും മണി വ്യക്തമാക്കി. സ്ത്രീകളെ മോശമായി ചിത്രീകരിച്ച് താൻ പ്രസംഗിച്ചിട്ടില്ല. ദീര്‍ഘമായ തന്‍റെ പ്രസംഗം വെട്ടിച്ചുരുക്കി പ്രശ്‍നങ്ങളുണ്ടാക്കുകയാണെന്നും മണി പറഞ്ഞു. ഖേദപ്രകടനത്തോടെ അധ്യായം അടഞ്ഞു.

മാധ്യമങ്ങൾ തന്നെ ഒരുപാട് ഉപദ്രവിച്ചിട്ടുണ്ട്. തന്നോട് ഇങ്ങനെ ചെയ്യേണ്ടിയിരുന്നില്ല എന്നും മണി പ്രതികരിച്ചു. താൻ ഭൂമി കയ്യേറിയെന്ന തരത്തിലുള്ള പ്രചാരണം തെറ്റാണ്. മന്ത്രി സ്ഥാനം രാജി വെച്ചാലും തന്‍റെ ശൈലി മാറ്റില്ല എന്നും മണി പ്രതികരിച്ചു.

Will not say story, no plans to change style even if forced to resign minister post, says Mani