ജൂണ്‍ 17 ന് ശേഷം സര്‍വീസില്‍ തിരിച്ചെത്തുമെന്ന് ജേക്കബ് തോമസ്

തിരുവനന്തപുരം: ഈ മാസം 17ന് ശേഷം സര്‍വീസില്‍ തിരിച്ചെത്തുമെന്ന് മുന്‍ വിജിലന്‍സ് ഡയറക്ടര്‍ ജേക്കബ് തോമസ് പറഞ്ഞു. 17ന് അവധി അവസാനിക്കും. അതിനുശേഷം സര്‍വീസില്‍ പ്രവേശിക്കും. എന്നാല്‍ തിരിച്ചെത്തുമ്പോള്‍ ഏത് തസ്‍തികയാണ് ലഭിക്കുക എന്ന് സര്‍ക്കാര്‍ സൂചനയൊന്നും നല്‍കിയിട്ടില്ലെന്നും അദ്ദേഹം പറഞ്ഞു.

എന്തെങ്കിലും കാര്യത്തിന് മുന്നിട്ടിറങ്ങിയാല്‍ അതില്‍നിന്ന് പിന്നോട്ട് പോകുന്നത് ശരിയല്ലെന്നും ജേക്ക്ബ് തോമസ് മാധ്യമപ്രവര്‍ത്തകരോട് പറഞ്ഞു. വിജിലന്‍സ് കേസുകളുമായി ബന്ധപ്പെട്ട് കോടതികളില്‍നിന്ന് നിരന്തരം വിമര്‍ശനം കേള്‍ക്കേണ്ടിവന്നതിനെത്തുടര്‍ന്നാണ് ഡയറക്ടറായിരുന്ന ജേക്കബ് തോമസ് അവധിയില്‍ പ്രവേശിച്ചത്. സര്‍ക്കാര്‍തന്നെയാണ് അദ്ദേഹത്തോട് അവധിയില്‍ പ്രവേശിക്കാന്‍ ആവശ്യപ്പെട്ടത് എന്നും വാര്‍ത്തകള്‍ ഉണ്ടായിരുന്നു.

പിന്നീട്, സുപ്രീം കോടതി ഉത്തരവിലൂടെ ടിപി സെന്‍കുമാര്‍ ഡിജിപി സ്ഥാനത്ത് തിരിച്ചെത്തിയതോടെ ഡിജിപിയായിരുന്ന ലോക്നാഥ് ബെഹ്‍റയെ വിജിലന്‍സ് ഡയറക്ടറായി സര്‍ക്കാര്‍ നിയമിച്ചു. ഇതോടെയാണ് ജേക്കബ് തോമസ് തിരികെയെത്തുമ്പോള്‍ ഏത് സ്ഥാനം നല്‍കുമെന്നതില്‍ അവ്യക്തത ഉടലെടുത്തത്. ജൂണ്‍ 30ന് ടിപി സെന്‍കുമാര്‍ വിരമിക്കാനിരിക്കെയാണ് ജേക്കബ് തോമസ് തിരികെയെത്തുന്നത്.

Will rejoin aftre June 17: Jacob Thomas

Former Vigilance Director Jacob Thomas said that he will rejoin after June 17.