ഒരാളിൽ നിന്ന് 15 പേരിലേയ്ക്ക്; കേരളത്തിൽ ഇപ്പോൾ പകരുന്നത് തീവ്രത കൂടിയ വൈറസോ?

കൊച്ചി: സംസ്ഥാനത്ത് മൂന്നാം ഘട്ടത്തില്‍ പടരുന്നത് സാര്‍സ് കോവ് 2 വൈറസിന്‍റെ തീവ്രതയേറിയ പതിപ്പാണെന്ന് സംശയം. രാജ്യത്തെ കൊവിഡ് ഹോട്ട്സ്പോട്ടുകളില്‍ നിന്ന് എത്തിയവരില്‍ നിന്ന് ഉയര്‍ന്ന തോതിലുള്ള രോഗവ്യാപനമാണ് ഉണ്ടാകുന്നതെന്നാണ് സംശയം. സമ്പര്‍ക്കം വഴി തീവ്രമായ തോതില്‍ രോഗബാധയുണ്ടാകുന്നതായി ആരോഗ്യവിദഗ്ധര്‍ സംശയിക്കുന്നുണ്ടെന്നാണ് ഏഷ്യാനെറ്റ് ന്യൂസ് റിപ്പോര്‍ട്ട് ചെയ്യുന്നത്.

ഇതുവരെ സംസ്ഥാനത്ത് ലോകശരാശരിയെക്കാള്‍ വളരെ കുറഞ്ഞ നിരക്കില്‍ മാത്രമായിരുന്നു രോഗവ്യാപനമുണ്ടായിരുന്നതെങ്കില്‍ പുതുതായി രോഗം സ്ഥിരീകരിക്കുന്നവരില്‍ നിന്ന് ഉയര്‍ന്ന തോതില്‍ രോഗവ്യാപനമുണ്ടാകുന്നുണ്ടെന്നാണ് നിരീക്ഷണം. വയനാട്ടിലെ ട്രക്ക് ഡ്രൈവറില്‍ നിന്ന് 15 പേര്‍ക്ക് രോഗബാധയുണ്ടായെന്നതാണ് ഞെട്ടിക്കുന്നത്. കൂടാതെ മഹാരാഷ്ട്രയില്‍ നിന്ന് കാസര്‍കോടെത്തിയ ആളില്‍ നിന്ന് നാലു പേര്‍ക്ക് രോഗം ബാധിക്കുകയും ചെയ്തു. രോഗികളു‍ടെ സമ്പര്‍ക്ക പട്ടിക പരിശോധിച്ചപ്പോള്‍ രോഗിയുമായി വളരെ കുറഞ്ഞ സമയം ചെലവഴിച്ചവര്‍ക്കു പോലും രോഗബാധയുണ്ടായതായാണ് റിപ്പോര്‍ട്ട്.

Also Read: കൊവിഡിൻ്റെ മൂന്നാംഘട്ടം ഉണ്ടാകുമോ?, അപകടരമെന്ന് ആരോഗ്യമന്ത്രി, ഇളവുകൾ പ്രതീക്ഷിക്കേണ്ട

എന്നാല്‍ സംസ്ഥാനത്ത് രണ്ടാം ഘട്ടത്തില്‍ കൊവിഡ് വ്യാപനമുണ്ടായപ്പോള്‍ വലിയ സമ്പര്‍ക്ക പട്ടികയുണ്ടായിരുന്നവര്‍ പോലും രോഗം പകര്‍ന്നു കൊടുത്തത് ചുരുക്കം പേര്‍ക്കായിരുന്നു. കാസര്‍കോട് ഏരിയാല്‍ സ്വദേശിയുടെയും വര്‍ക്കലയിലെത്തിയ ഇറ്റാലിയൻ പൗരൻ്റെയും സമ്പര്‍ക്ക പട്ടിക വളരെ വലുതായിരുന്നെങ്കിലും ഇവര്‍ക്ക് ആര്‍ക്കും രോഗമുണ്ടായില്ലെന്നതാണ് ശ്രദ്ധേയം. എന്നാൽ രാജ്യത്തെ റെഡ് സോണുകളില്‍ നിന്ന് ഇപ്പോള്‍ എത്തിയിരിക്കുന്ന വൈറസ് രോഗതീവ്രതയും രോഗബാധാ നിരക്കും കൂടിയതാണെന്നാണ് ആശങ്ക.

Also Read: COVID-19: മഹാരാഷ്‌ട്രയിൽ കൊവിഡ് ബാധിതരായ പോലീസുകാരുടെ എണ്ണം 1,140 ആയി

ഒരാളില്‍ നിന്ന് ശരാശരി രണ്ട് മുതല്‍ മൂന്ന് പേരിലേയ്ക്ക് വരെ കൊവിഡ്-19 വൈറസ് ബാധിക്കാമെന്നാണ് ലോകാരോഗ്യസംഘടനയുടെ കണക്ക്. എന്നാല്‍ കേരളത്തില്‍ ഇത് 0.4 മാത്രമായിരുന്നു. എന്നാല്‍ പുതിയ കണക്കുകള്‍ പ്രകാര രോഗബാധാ നിരക്ക് ലോകശരാശരിയെക്കാള്‍ മുകളിലാണ്. പുതിയ രോഗികളുടെ സമ്പര്‍ക്ക പട്ടികയിലുള്ളവര്‍ നിരീക്ഷണത്തില്‍ കഴിയുന്ന സാഹചര്യത്തില്‍ ഈ നിരക്ക് ഉയരാനും സാധ്യതയുണ്ട്.