ശബരിമലയിൽ ഈ മാസം തന്നെ വനിതാ പൊലീസുകാരെ നിയമിക്കും

പത്തനംതിട്ട: ശബരിമലയിൽ സ്ത്രീകളെ പ്രവേശിപ്പിക്കാമെന്ന സുsപ്രീം കോടതി വിധിയെ തുടർന്ന് സുരക്ഷാ സന്നാഹങ്ങളുടെ ഭാഗമായി വനിതാ പൊലീസുകാരെ നിയോഗിക്കാൻ ഒരുങ്ങി കേരള പോലീസ്. ഈ മാസം 14,15 തീയതികളിൽ ശബരിമലയിൽ വനിതാ പോലീസുകാർ ഡ്യൂട്ടിക്കെത്തും.

വിവിധ ഹിന്ദു സംഘടനകൾ വിധിക്കെതിരെ രംഗത്ത് വന്ന സ്ഥിതിക്ക് കഴിവതും നേരത്തെ പൊലീസുകാരെ ശബരിമലയിൽ എത്തിക്കാനാണ് ശ്രമം. 40 വനിതാ പോലീസുകാരുടെ പട്ടിക ഡിജിപിയുടെ അംഗീകാരത്തിനായി അയച്ചിട്ടുണ്ട്. ശബരിമലയിൽ വനിതാ പൊലീസുകാരെ നിയമിക്കണമെന്ന് കാണിച്ച് ദേവസ്വം കമ്മിഷണർ സർക്കുലർ ഇറക്കി. ഡിജിപിയുടെ അംഗീകാരം ലഭിക്കുന്നതനുസരിച്ച് 30 വനിതാ പോലീസുകാരെയെങ്കിലും മണ്ഡല - മകരവിളക്ക് പൂജ സമയത്തേക്കും മാസ പൂജ സമയത്തേക്കും നിയോഗിക്കാനാണ് പദ്ധതി.

അതിനിടെ, മുഖ്യമന്ത്രിയുമായി ഇപ്പോൾ ചർച്ചക്ക് ഒരുക്കമല്ലെന്ന് ശബരിമല തന്ത്രി കുടുംബം അറിയിച്ചു. കണ്ഠരര് മോഹനര് മുഖ്യമന്ത്രിയുമായുള്ള ചർച്ചയിൽ നിന്ന് പിന്മാറി. റിവ്യൂ ഹർജി സമർപ്പിക്കുന്നത് സംബന്ധിച്ചുള്ള തീരുമാനം കൈക്കൊണ്ട ശേഷം മാത്രമേ ചർച്ചക്കുള്ളൂവെന്ന് തന്ത്രി വ്യക്തമാക്കി. പന്തളം രാജകുടുംബവും തന്ത്രി കുടുംബവും സംയുകതമായി വിധിക്കെതിരെ പുനഃപരിശോധനാ ഹർജി കൊടുക്കാൻ തീരുമാനിച്ചിരുന്നു.