കാമുകന്‍റെ ലിംഗച്ഛേദം; യുവാവും യുവതിയും ഒന്നിക്കുന്നു

കൊച്ചി: കുറ്റിപ്പുറത്ത് യുവാവിന്റെ ജനനേന്ദ്രിയത്തിന് മുറിവേറ്റ സംഭവത്തില്‍ യുവാവും യുവതിയും ഒന്നിച്ചുജീവിക്കാന്‍ ആഗ്രഹിക്കുന്നതായി ഹൈക്കോടതിയെ അറിയിച്ചു. യുവാവിനെ വീട്ടുകാര്‍ തടഞ്ഞുവെച്ചിരിക്കയാണെന്നുകാണിച്ച് യുവതി നല്‍കിയ ഹേബിയസ് കോര്‍പ്പസ് ഹര്‍ജിയിലാണിത്.

സെപ്റ്റംബര്‍ 21-നാണ് വിവാഹവാഗ്ദാനം നല്‍കി വഞ്ചിക്കാന്‍ ശ്രമിച്ച സംഭവത്തില്‍ കുറ്റിപ്പുറത്തെ ലോഡ്ജില്‍ വച്ച് മലപ്പുറം പുറത്തൂര്‍ സ്വദേശിയായ യുവാവിന് ജനനേന്ദ്രിയത്തില്‍ മുറിവേറ്റത്. സംഭവത്തില്‍ അറസ്റ്റിലായ യുവതി ജാമ്യത്തിലിറങ്ങിയാണ് ഹൈക്കോടതിയെ സമീപിച്ചത് . ജനനേന്ദ്രിയത്തിലെ മുറിവ് അബദ്ധത്തില്‍ പറ്റിയതാണെന്നും യുവതി മുറിച്ചതല്ലെന്നും യുവാവ് കോടതിയില്‍ ബോധിപ്പിച്ചു.

യുവതിയുടെകൂടെ ജീവിക്കാനാണ് ആഗ്രഹമെന്ന് അറിയിച്ചതിനെത്തുടര്‍ന്ന് കോടതി യുവാവിനെ സ്വന്തം ഇഷ്ടപ്രകാരം പോകാന്‍ അനുവദിച്ചു. വിവാഹിതരാണെന്നും യുവാവിനെ വീട്ടുകാര്‍ തടഞ്ഞുവെച്ചിരിക്കയാണെന്നുമാണ് യുവതി ഹേബിയസ് കോര്‍പ്പസ് ഹര്‍ജിയില്‍ ബോധിപ്പിച്ചത്.