വീട്ടമ്മയെ കൊന്നത് മകന്‍റെ സുഹൃത്തെന്ന് പോലീസ്

കറ്റാനം: ജനലിൽ തൂങ്ങി മരിച്ച നിലയിൽ കണ്ടെത്തിയ വീട്ടമ്മ കൊല്ലപ്പെട്ടതാണെന്ന് പോലീസ്. കണ്ണനാംകുഴിയിൽ മാങ്കൂട്ടത്തിൽ സുധാകരന്റെ ഭാര്യ തുളസി(48)യെയാണ് മരിച്ച നിലയിൽ കണ്ടെത്തിയത്. തുളസിയുടെ മകന്റെ കൂട്ടുകാരൻ കേസിൽ പിടിയിലായി. കഴിഞ്ഞ 22 നാണ് തുളസി മരിച്ചത്.

സംഭവത്തിൽ വെട്ടിക്കോട് മുകുളയ്യത്ത് പുത്തൻവീട്ടിൽ ജെറിൻ രാജു(19) ആണ് പിടിയിലായത്. കൊലപാതകത്തിന് ശേഷം തെളിവ് നശിപ്പിക്കാൻ ജെറിൻ മൃതദേഹത്തിന് ചുറ്റും മുളകുപൊടി വിതറിയിരുന്നു.അലമാരിയിൽ സൂക്ഷിച്ചിരുന്ന പണം മോഷ്ടിക്കാൻ ജെറിൻ നടത്തിയ ശ്രമത്തിനിടെയാണ് തുളസി കൊല്ലപ്പെട്ടത്. ബന്ധുക്കൾ നൽകിയ പരാതിയെ തുടർന്നുള്ള അന്വേഷണത്തിലാണ് തുളസി കൊല്ലപ്പെട്ടതാണെന്ന് കണ്ടെത്തിയത്.