വനിതാ മതില്‍: ചെന്നിത്തല ആലപ്പുഴ കളക്ടറെ പ്രതിഷേധം അറിയിച്ചു

തിരുവനന്തപുരം: ആലപ്പുഴ ജില്ലയിലെ വനിതാ മതില്‍ പരിപാടിയുടെ മുഖ്യ രക്ഷാധികാരിയായി ചുമതലപ്പെടുത്തിയ നടപടിയില്‍ പ്രതിഷേധവുമായി പ്രതിപക്ഷ നേതാവ് രമേശ് ചെന്നിത്തല. ആലപ്പുഴ ജില്ലാ കളക്ടറെ വിളിച്ച് രമേശ് ചെന്നിത്തല ഇക്കാര്യത്തിലുള്ള തന്‍റെ പ്രതിഷേധമറിയിച്ചു. അപഹാസ്യമായ നടപടിയാണ് സര്‍ക്കാരിന്‍റെ ഭാഗത്ത് നിന്നും ഉണ്ടായതെന്നും ചെന്നിത്തല വ്യക്തമാക്കി.

സര്‍ക്കാരിന്‍റെ വനിതാ മതില്‍ പരിപാടിയെ രൂക്ഷമായി വിമര്‍ശിച്ച് കൊണ്ട് നിലപാടെടുത്ത ചെന്നിത്തലയെ തന്നെ വനിതാമതിലിന്‍റെ ആലപ്പുഴ ജില്ലയിലെ മുഖ്യ രക്ഷാധികാരിയായി തീരുമാനിച്ചതാണ് ഏറെ കൗതുകമുണര്‍ത്തിയത്. രമേശ് ചെന്നിത്തലയെ അറിയിക്കാതെയാണ് ആലപ്പുഴ ജില്ലാ ഭരണകൂടം ഇത്തരമൊരു തീരുമാനമെടുത്തത്.


ഇന്ന് ഉച്ചതിരിഞ്ഞ് ധനവകുപ്പ് മന്ത്രി തോമസ് ഐസക്കിന്‍റെ അധ്യക്ഷതയില്‍ ചേര്‍ന്ന സംഘാടക സമിതി യോഗത്തിലാണ് രമേശ് ചെന്നിത്തലയ്ക്ക് ആലപ്പുഴ ജില്ലയിലെ വനിതാ മതില്‍ പരിപാടിയുടെ മുഖ്യ രക്ഷാധികാരിയുടെ ചുമതല നല്‍കിക്കൊണ്ട് തീരുമാനമായത്. ഇതിന് പിന്നാലെയാണ് തന്നെ അറിയിക്കാതെ എടുത്ത തീരുമാനത്തിനെതിരെ ചെന്നിത്തല രംഗത്തെത്തിയത്.