ജോർജിനെതിരെ കേസെടുക്കുമെന്ന് ദേശീയ വനിതാ കമ്മീഷൻ

ന്യൂഡൽഹി: പി.സി.ജോർജിനെതിരെ നടപടിയെടുക്കാനൊരുങ്ങി ദേശീയ വനിതാ കമ്മീഷൻ. ജലന്ധർ ബിഷപ്പ് ഫ്രാങ്കോ മുളക്കലിനെതിരെ പരാതി നൽകിയ കന്യാസ്ത്രീക്കെതിരെ അപകീർത്തികരമായ പരാമർശം നടത്തിയതിനാണ്
ജോർജിനെതിരെ നടപടിക്ക് ഒരുങ്ങുന്നത്. എല്ലാ നിയമസഭാ സാമാജികർക്കും ജോർജ് അപമാനമാണെന്ന് വനിതാ കമ്മീഷൻ അധ്യക്ഷ രേഖ ശർമ്മ പറഞ്ഞു.

അപകീർത്തികരമായ പരാമർശം നടത്തിയതിന് പി.സി.ജോർജിനെതിരെ പരാതി നൽകുമെന്ന് കന്യാസ്ത്രീയുടെ കുടുംബം നേരത്തെ അറിയിച്ചിരുന്നു. ബിഷപ്പ് ഫ്രാങ്കോ മുളക്കലിനെതിരെ പരാതി നൽകിയ കന്യാസ്ത്രീയെ അധിക്ഷേപിച്ച് പി.സി.ജോർജ്ജ് ഇന്നലെയാണ് മാധ്യമങ്ങളോട് സംസാരിച്ചത്. നിയമസഭാ സ്‌പീക്കറിനും ദേശീയ വനിതാ കമ്മീഷനും ജോർജിനെതിരെ പരാതി നൽകുമെന്ന് കന്യാസ്ത്രീയുടെ കുടുംബം അറിയിച്ചു. പി.സി.ജോർജിന്റെ പരാമർശത്തെ തുടർന്ന് കന്യാസ്ത്രീ ഇന്ന് നിശ്ചയിച്ചിരുന്ന പത്രസമ്മേളനം മാറ്റിവെച്ചു.

സംഭവത്തില്‍ ഫ്രാങ്കോ മുളയ്ക്കലിന്‍റെ ഭാഗത്ത് തെറ്റ് കാണില്ലെന്നാണ് പി.സി ജോർജിന്റെ നിലപാട്. കൂടാതെ പന്ത്രണ്ട് പ്രാവശ്യം പീഡനത്തിനിരയായ കന്യാസ്ത്രീ പതിമൂന്നാം തവണ പരാതി നല്‍കിയതില്‍ ദുരൂഹതയുണ്ടെന്നും പി.സി ജോര്‍ജ്ജ് പറഞ്ഞിരുന്നു. തങ്ങൾക്ക് നീതി ലഭിക്കുമെന്ന വിശ്വാസത്തിലാണ് മുൻപോട്ട് പോകുന്നത്. നീതി തേടി കൂടെയുള്ള കന്യാസ്ത്രീകൾ തെരുവിലിറങ്ങിയപ്പോൾ ഒരു എംഎൽഎ നടത്തിയ പ്രസ്താവന ഏറെ വേദനിപ്പിച്ചെന്ന് കന്യാസ്ത്രീയുടെ സഹോദരൻ പറഞ്ഞു.ഇപ്പോൾ കന്യാസ്ത്രീയ്ക്ക് കടുത്ത മാനസിക പ്രയാസമുണ്ടായെന്നും അത് മാറിയാൽ ഉടനെ അവരെ മാധ്യമനകളുടെ മുന്നിൽ എത്തിക്കുമെന്നും ബന്ധുക്കൾ വ്യക്തമാക്കി.