ദീപ നിശാന്ത് തൻ്റെ കവിത മോഷ്ടിച്ചെന്ന് കവി കലേഷിൻ്റെ പരാതി

തിരുവനന്തപുരം: കോളേജ് അധ്യാപികയും എഴുത്തുകാരിയുമായ ദീപ നിഷാന്ത് കവിത മോഷ്ടിച്ചതായി പരാതി. കവി എസ് കലേഷിന്‍റെ 'അങ്ങനെയിരിക്കെ മരിച്ചുപോയ് ഞാന്‍/ നീ' എന്ന കവിത മോഷ്ടിച്ച് വികലമാക്കി പ്രസിദ്ധീകരിച്ചു എന്നാണ് ആരോപണമുയര്‍ന്നിരിക്കുന്നത്.

2011ലാണ് കലേഷ് കവിത എഴുതുന്നത്. എന്നാൽ ദീപ നിശാന്തിന്‍റെ ചിത്രം സഹിതം എകെപിസിറ്റിഎ മാഗസിനിൽ പ്രസിദ്ധീകരിച്ച കവിത സുഹൃത്തുക്കള്‍ അയച്ചു നൽകിയപ്പോഴാണ് കവിത മോഷ്ടിച്ചതായി ശ്രദ്ധയിൽപ്പെട്ടതെന്ന് കലേഷ് ആരോപിച്ചു. ശബ്ദമഹാസമുദ്രം എന്ന കവിതാ സമാഹാരത്തിൽ പ്രസിദ്ധീകരിച്ചിരിച്ച കവിതയുടെ ചിത്രങ്ങള്‍ ഉള്‍പ്പെടെയാണ് കലേഷ് ഫേസ്ബുക്കിൽ ആരോപണം ഉന്നയിച്ചിരിക്കുന്നത്.


തന്‍റെ കവിതയിലെ വരികള്‍ ദീപ നിഷാന്ത് വികലമായി വെട്ടിമുറിച്ചെന്നും തന്‍റെ വരികള്‍ തന്നെ ചെറിയ മാറ്റങ്ങള്‍ വരുത്തി പ്രസിദ്ധീകരിക്കുകയായിരുന്നുവെന്നുമാണ് കലേഷ് പറയുന്നത്. കലേഷിന്‍റെ ഫേസ്ബുക്ക് പോസ്റ്റിന് താഴെ മറ്റു കവികളും പ്രതികരണവുമായി എത്തിയിട്ടുണ്ട്. എന്നാൽ ദീപ നിഷാന്ത് ഇതുവരെ വിഷയത്തിൽ പ്രതികരിച്ചിട്ടില്ല.