'നവോത്ഥാനം' ഇപ്പോൾ ഒരു ബ്രാൻഡ് നെയിം മാത്രം: സക്കറിയ

കൊച്ചി: നവോത്ഥാനം എന്ന പദം ഇപ്പോൾ ഒരു ബ്രാൻഡ് നെയിം മാത്രമായെന്നും ചർച്ചകൾ ഉപരിപ്ലവമായെന്നും എഴുത്തുകാരൻ സക്കറിയ. യൂറോപ്പിൽ ക്രിസ്തുമതത്തെ പുറത്താക്കി കൊണ്ടാണ് നവോത്ഥാനം ഉണ്ടായത്. ഇന്ത്യൻ ജനതക്ക് ഇപ്പോഴും ജാതി, മത വേലിക്കെട്ടുകളിൽ നിന്ന് പുറത്ത് വരാൻ കഴിഞ്ഞിട്ടില്ലെന്നും സക്കറിയ കുറ്റപ്പെടുത്തി. നവോത്ഥാനം എന്ന പേര് എന്തിനും ചാർത്തി കൊടുക്കുന്ന പ്രവണത ശരിയല്ലെന്നും സക്കറിയ പറഞ്ഞു. ശബരിമല സ്ത്രീപ്രവേശനത്തിനെതിരെ ബിജെപിയുടെ നേതൃത്വത്തിൽ സ്ത്രീകൾ രംഗത്ത് വന്നത് വലതുപക്ഷ ശക്തികളുടെ മുന്നേറ്റമായി കാണാനാകില്ല. പിണറായി വിജയന് അല്ലാതെ സിപിഎമ്മിൽ മറ്റാർക്കും ശബരിമല യുവതീപ്രവേശനത്തോട് യോജിപ്പുള്ളതായി തോന്നുന്നില്ലെന്നും സക്കറിയ സൂചിപ്പിച്ചു. ശബരിമല ഉൾപ്പടെയുള്ള വിഷയങ്ങൾ മാധ്യമങ്ങൾ ലാഭമുണ്ടാക്കാനായി പർവതീകരിച്ച് കാണിക്കുകയാണെന്നും സക്കറിയ നിരീക്ഷിച്ചു. അത്തരം നിലപാടുകളിൽ നിന്ന് മാധ്യമങ്ങൾ പിൻവാങ്ങുന്നതോടെ മാത്രമേ വിഷയനഗൽ കെട്ടടങ്ങൂ എന്ന് സക്കറിയ കൃതി വിജ്ഞാനോത്സവത്തിൽ അഭിപ്രായപ്പെട്ടു.