പി കെ ശശിക്കെതിരെ പരാതി കിട്ടിയെന്ന് യെച്ചൂരി; കിട്ടിയില്ലെന്ന് കാരാട്ട്

ന്യൂഡൽഹി: ഷൊര്‍ണൂര്‍ എംഎൽഎ പി കെ ശശിക്കെതിരായ പീഡനപരാതി ലഭിച്ചെന്ന് സിപിഎം ജനറൽ സെക്രട്ടറി സീതാറാം യെച്ചൂരിയുടെ സ്ഥിരീകരണം. പരാതി സംസ്ഥാന ഘടകത്തിന് കൈമാറിയ ശേഷം തുടര്‍നടപടിയ്ക്ക് നിര്‍ദേശം നല്‍കിയതായും യെച്ചൂരി വ്യക്തമാക്കി. പരാതി ലഭിച്ചാൽ അതേപ്പറ്റി അന്വേഷിക്കുന്നത് സ്വാഭാവികമാണെന്നും തിങ്കളാഴ്ച തന്നെ ഇത് സംബന്ധിച്ച് നിര്‍ദേശം നല്‍കിയിരുന്നുവെന്നും യെച്ചൂരി പറഞ്ഞു.

എന്നാൽ പി കെ ശശിക്കെതിരെ തനിക്ക് പരാതി ലഭിച്ചിട്ടില്ലെന്ന് പോളിറ്റ് ബ്യൂറോ അംഗം പ്രകാശ് കാരാട്ട് പറഞ്ഞു. സിപിഎം പാലക്കാട് ജില്ലാ സെക്രട്ടറി സി കെ രാജേന്ദ്രനും ഇതേ പ്രതികരണം നടത്തിയിരുന്നു. സീതാറാം യെച്ചൂരിയ്ക്ക് പരാതിക്കാരിയായ ഡിവൈഎഫ്ഐ നേതാവ് ഇമെയിലിൽ നല്‍കിയ പരാതിയ്ക്കൊപ്പം എംഎൽഎയുടെ അശ്ലീലച്ചുവയുള്ള സംഭാഷണത്തിന്‍റെ ശബ്ദരേഖയും ഉണ്ടെന്നാണ് റിപ്പോര്‍ട്ടുകള്‍.