ശക്തമായ മഴയ്ക്കും കാറ്റിനും സാധ്യത; രണ്ട് ജില്ലകളില്‍ ജാഗ്രതാ നിര്‍ദ്ദേശം

തിരുവനന്തപുരം: ശക്തമായ മഴയ്ക്കും കാറ്റിനും സാധ്യതയുണ്ടെന്ന മുന്നറിയിപ്പ് കണക്കിലെടുത്ത് കേരളത്തിലെ രണ്ട് ജില്ലകളില്‍ യെല്ലോ അലേര്‍ട്ട്. കൊല്ലം, ആലപ്പുഴ ജില്ലകളിലാണ് ജാഗ്രതാ നിര്‍ദ്ദേശം പുറപ്പെടുവിച്ചിരിക്കുന്നത്.

കാറ്റിന്‍റെ വേഗത മണിക്കൂറില്‍ വര്‍ധിക്കുമെന്ന മുന്നറിയിപ്പ് കാലാവസ്ഥാ നിരീക്ഷണ കേന്ദ്രം നല്‍കിയിട്ടുണ്ട്. തെക്ക്, പടിഞ്ഞാറ് ബംഗാള്‍ ഉള്‍ക്കടലിലും തമിഴ്നാട്, പുതുച്ചേരി തീരങ്ങളിലും തെക്കന്‍ ആന്ധ്ര തീരത്തും ഗള്‍ഫ് ഒാഫ് മാന്നാര്‍ പ്രദേശത്തും ശക്തമായ കാറ്റ് വീശാനിടയുണ്ടെന്ന് മുന്നറിയിപ്പ് നല്‍കിയിട്ടുണ്ട്.

അതേസമയം ഗജ ചുഴലിക്കാറ്റിനെ തുടർന്ന് തമിഴ്നാട്ടിൽ ദുരിതമനുഭവിക്കുന്നവരെ സഹായിക്കുന്നതിന് റിലീഫ് സെൻറർ തുറക്കുന്നു. എറണാകുളം കടവന്ത്രയിലെ റീജിയണൽ സ്പോർട്സ് സെൻററിൽ ഇന്നു വൈകിട്ട് ആറു മണി മുതൽ ശനിയാഴ്ച വൈകിട്ടു വരെ റിലീഫ് സെന്റർ പ്രവർത്തിക്കും. ജില്ലാഭരണകൂടത്തിന്‍റെ ആഭിമുഖ്യത്തിലാണ് സംവിധാനം ക്രമീകരിച്ചിരിക്കുന്നത്.