ഇടപ്പള്ളിയിൽ യുവതിയെ കൊന്ന് യുവാവ് ആത്മഹത്യ ചെയ്തു

കൊച്ചി: ഇടപ്പള്ളിയിൽ യുവതിയെ കൊന്ന ശേഷം യുവാവ് ആത്മഹത്യ ചെയ്തു. നൗഫൽ, മീര എന്നിവരാണ് മരിച്ചത്. അമ്മയ്ക്കും നാല് വയസുള്ള മകൾക്കുമൊപ്പം പോണേക്കരയിലെ വാടക വീട്ടിലായിരുന്നു മീര താമസിച്ചിരുന്നത്. ഈ വീട്ടിൽ വെച്ചാണ് സംഭവം നടന്നത്. വിവാഹമോചിതയായ മീരയും നൗഫലും തമ്മിൽ ഏറെ നാളായി അടുപ്പത്തിലായിരുന്നു. ഇതിനിടെ മീരയ്ക്ക് മറ്റൊരാളുമായി ബന്ധം ഉണ്ടെന്ന് ആരോപിച്ച് നൗഫൽ മീരയുമായി പതിവായി വാക്കുതര്‍ക്കത്തിലേര്‍പ്പെടാറുണ്ടായിരുന്നു. ഇതേ തുടർന്നുള്ള വൈരാഗ്യമാണ് കൊലപാതകത്തിലേക്കും ആത്മഹത്യയിലേക്കും നയിച്ചതെന്നാണ് നാട്ടുകാരുടെ അനുമാനം.

മൃതദേഹം കണ്ടെത്തിയ മുറിയിൽ നിന്ന് രക്തക്കറ പുരണ്ട കത്തിയും മുറിക്കുള്ളിൽ വ്യാപിച്ചിട്ടുള്ള രക്തക്കറകളുമാണ് കൊലപാതകം ആണെന്ന് പോലീസ് സ്ഥിരീകരിക്കാൻ കാരണം. നൗഫലിന്‍റെ മൃതദേഹം മുറിയിൽ തൂങ്ങിയ നിലയിലാണ് കണ്ടെത്തിയത്. എന്നാൽ മീരയുടെ മൃതദേഹം നഗ്‌നമായ നിലയിൽ നിലത്ത് കിടക്കുകയായിരുന്നു.

താൻ മരിക്കാൻ പോവുകയാണെന്ന് ബന്ധുക്കളെ വിളിച്ച് അറിയിച്ച ശേഷമാണ് യുവാവ് ആത്മഹത്യ ചെയ്തത്. നൗഫലിന്‍റെ സംശയരോഗമാണ് കൊലപാതകത്തിലേക്കും തുടർന്നുള്ള ആത്മഹത്യയിലേക്കും നയിച്ചതെന്നാണ് പോലീസിന്‍റെ പ്രാഥമിക നിഗമനം.