കെപിസിസി നേതൃത്വം മാറണമെന്ന് യൂത്ത് കോണ്‍ഗ്രസ്

തിരുവനന്തപുരം: നിയമസഭാ തെരഞ്ഞെടുപ്പില്‍ ഒ. രാജഗോപാല്‍ വിജയിച്ച നേമത്ത് വോട്ട് കച്ചവടം നടന്നുവെന്ന ആരോപണവുമായി യൂത്ത് കോണ്‍ഗ്രസ്. തോല്‍വിയുടെ പശ്ചാത്തലത്തില്‍ കെപിസിസി നേതൃത്വത്തില്‍ മാറ്റം വേണമെന്ന് യൂത്ത് കോണ്‍ഗ്രസ് ആവശ്യപ്പെട്ടു. അറിയപ്പെടുന്ന കോണ്‍ഗ്രസ് നേതാക്കള്‍ ബി.ജെ.പിക്കായി പ്രവര്‍ത്തിച്ചുവെന്നും യുത്ത് കോണ്‍ഗ്രസ് ആരോപിച്ചു.

ഡിസിസിയിലെ ജംബോ കമ്മിറ്റികള്‍ പിരിച്ചുവിടണമെന്നും യൂത്ത് കോണ്‍ഗ്രസ് സംസ്ഥാന കമ്മിറ്റി ആവശ്യപ്പെട്ടു. തിരുവനന്തപുരത്ത് നടന്ന യൂത്ത് കോണ്‍ഗ്രസ് സംസ്ഥാന കമ്മിറ്റിയിലാണ് ഇക്കാര്യങ്ങള്‍ ഉന്നയിച്ചത്.കഴിഞ്ഞ നിയമസഭാ തെരഞ്ഞെടുപ്പില്‍ നേമത്ത് മൂന്നാം സ്ഥാനത്തേക്ക് പിന്തള്ളപ്പെട്ട യു.ഡി.എഫിന് കെട്ടിവച്ച കാശ് നഷ്ടപ്പെട്ടിരുന്നു. കഴിഞ്ഞ തവണ ഇരുപതിനായിരത്തിലധികം വോട്ടുകള്‍ ലഭിച്ച യു.ഡി.എഫിന് ഇത്തവണ പതിമൂവായിരം വോട്ടുകള്‍ മാത്രമാണ് നേമത്ത് ലഭിച്ചത്.