മോഹന്‍ലാലിന്റെ വീടിന് മുന്നില്‍ റീത്ത് വച്ച് യൂത്ത് കോൺഗ്രസ്

നടന്‍ ദിലീപിനെ താരസംഘടനയായ 'അമ്മ'യിലേക്ക് തിരിച്ചെടുത്തതില്‍ പ്രതിഷേധിച്ച്‌ നടന്‍ മോഹന്‍ലാലിന്റെ കൊച്ചിയിലെ വീട്ടിലേക്ക് യൂത്ത് കോണ്‍ഗ്രസ്സ്, കെ.എസ്.യു പ്രവര്‍ത്തകര്‍ മാര്‍ച്ച്‌ നടത്തി. റീത്തുമായാണ് യൂത്ത് കോണ്‍ഗ്രസ്, കെ.എസ്.യു പ്രവര്‍ത്തകര്‍ മാര്‍ച്ച്‌ നടത്തിയത്. 'അമ്മ' എന്ന സംഘടനയ്ക്ക് ആദരാഞ്ജലികള്‍ എന്ന ഫ്ലക്സ് വച്ചതിന് ശേഷം റീത്ത് ലാലിന്‍റെ വീടിന്‍റെ ഗേറ്റിൽ സമര്‍പ്പിച്ച്‌ ചന്ദനത്തിരിയും കത്തിച്ചാണ് പ്രതിഷേധം നടത്തിയത്.
ചിത്രം: ജിപ്സൺ സിക്കേര(TOI)

വീടിന് മുന്‍പിലെ ബോര്‍ഡുകള്‍ പ്രവര്‍ത്തകര്‍ നശിപ്പിച്ചു. സംഘടനയുടെ തലപ്പത്തിരിക്കുന്നവരേയും കുറ്റവാളിയെ തിരിച്ചെടുത്തപ്പോള്‍ മിണ്ടാതിരിക്കുന്ന ഗണേഷ് കുമാര്‍, മുകേഷ്, കെ.പി.എ.സി ലളിത എന്നീ ജനപ്രതിനിധികളേയും രൂക്ഷമായ ഭാഷയില്‍ വിര്‍ശിച്ചാണ് പ്രതിഷേധം നടത്തിയത്. ജനാധിപത്യമല്ല താരാധിപത്യമാണ് സംഘടനയില്‍ നടക്കുന്നതെന്നും കുറ്റവാളിക്കൊപ്പമാണ് സംഘടനയും സംഘടനയുടെ തലപ്പത്തിരിക്കുന്നവരും ജനപ്രതിനിധികളും നില്‍ക്കുന്നതെന്നും നേതാക്കള്‍ ആരോപിച്ചു.

പ്രസിഡന്റ് സ്ഥാനത്തു നിന്നും മോഹന്‍ലാല്‍ മാറി നില്‍ക്കണമെന്നും നടിക്ക് നീതി ലഭിക്കാത്ത സംഘടനയില്‍ തുടരാന്‍ മോഹന്‍ലാലിന് അര്‍ഹതയില്ലെന്നും അവര്‍ ആവശ്യപ്പെട്ടു. പിന്നീട് പോലീസെത്തി പ്രവര്‍ത്തകരെ അറസ്റ്റ് ചെയ്ത് നീക്കി. അതേസമയം, വിഷയത്തില്‍ മോഹന്‍ലാലിനെ വേട്ടയാടുന്നുവെന്ന് ആരോപിച്ച്‌ മോഹന്‍ലാല്‍ ഫാന്‍സ് അസോസിയേഷന്‍ പ്രതിഷേധവുമായി രംഗത്തെത്തി. മോഹന്‍ലാലിന് പിന്തുണയുമായി തിരുവനന്തപുരം രക്തസാക്ഷി മണ്ഡപത്തിന് മുന്നില്‍ മോഹന്‍ലാല്‍ ആരാധകര്‍ പ്രതിഷേധ സംഗമം സംഘടിപ്പിച്ചു.