തോമസ് ചാണ്ടിക്ക് നേരെ കരിങ്കൊടിയും ചീമുട്ടയേറും

അടൂര്‍: കായല്‍കൈയേറ്റ വിഷയത്തിപ്പെട്ട് രാജിവച്ച ശേഷം കൊച്ചിയിലേക്ക് തിരിച്ച എന്‍സിപി നേതാവ് തോമസ് ചാണ്ടിയ്ക്കു നേരെ പ്രതിഷേധം. അടൂരില്‍ വച്ച്‌ യൂത്ത് കോണ്‍ഗ്രസ് പ്രവര്‍ത്തകരാണ് തോമസ് ചാണ്ടിയെ കരിങ്കൊടി കാണിക്കുകയും ചീമുട്ടയെറിയുകയും ചെയ്തത്. പോലീസ് അകമ്പടിയിലായിരുന്നു തോമസ് ചാണ്ടിയുടെ യാത്ര. 20ഓളം വരുന്ന പ്രവര്‍ത്തകരാണ് പ്രതിഷേധവുമായെത്തിയത്.ഏറെ അനിശ്ചിതത്വങ്ങള്‍ക്കും നാടകീയതക്കുമൊടുവിലാണ് തോമസ് ചാണ്ടി മന്ത്രിസ്ഥാനം രാജിവെച്ചത്.

രാജിസമര്‍പിച്ചതിനു ശേഷം ഔദ്യോഗിക വാഹനത്തിലാണ് തോമസ് ചാണ്ടി കൊച്ചിയിലേക്ക് തിരിച്ചത്. വിവിധയിടങ്ങളില്‍ പോലീസ് തോമസ് ചാണ്ടിയുടെ വാഹനത്തിന് കടന്നുപോകാന്‍ വഴിയൊരുക്കുന്നുമുണ്ട്. എന്‍സിപി യോഗത്തില്‍ തോമസ് ചാണ്ടി കൈമാറിയ രാജിക്കത്ത് പാര്‍ട്ടി അധ്യക്ഷന്‍ ടി.പി.പീതാംബരന്‍ മാസ്റ്ററാണ് മുഖ്യമന്ത്രിക്ക് കൈമാറിയത്.

കത്ത് പീതാംബരന്‍ മാസ്റ്ററെ ഏല്‍പ്പിച്ച ഉടന്‍ ചാണ്ടി ആലപ്പുഴ വഴി കൊച്ചിയിലേക്ക് തിരിക്കുകയായിരുന്നു. ഇതിനിടെ മന്ത്രി സ്ഥാനം രാജിവെച്ചിട്ടും പോലീസ് അകമ്പടിയിലും ഔദ്യോഗിക വാഹനവും ചാണ്ടി ഉപയോഗിച്ചതിനെതിരെ വ്യാപക പ്രതിഷേധം ഉയര്‍ന്നു.