49-ാം ജന്മദിനത്തിൽ യൂത്ത് ഫ്രണ്ടും പിളര്‍ന്നു; രണ്ടിടങ്ങളിൽ ആഘോഷം

തിരുവനന്തപുരം: കേരള കോൺഗ്രസ് (എം) പിളര്‍ന്നതിനു പിന്നാലെ യൂവജന വിഭാഗമായ യൂത്ത് ഫ്രണ്ടും പിളര്‍ന്നു. സംഘടനയുടെ 49-ാം ജന്മദിനം ജോസ് കെ മാണി പക്ഷവും ജ പി ജെ ജോസഫ് പക്ഷവും രണ്ടിടങ്ങളിലായാണ് ആഘോഷിക്കുന്നത്.

തിരുവനന്തപുരത്ത് പി ജെ ജോസഫ് പക്ഷവും കോട്ടയത്ത് ജോസ് കെ മാണി പക്ഷവും ആഘോഷങ്ങള്‍ നടത്തും. യൂത്ത് ഫ്രണ്ട് സംസ്ഥാന പ്രസിഡൻ്റ് സജി മഞ്ഞക്കടമ്പിൽ പി ജെ ജോസഫ് പക്ഷത്താണ്. അതേസമയം യൂത്ത് ഫ്രണ്ട് സംസ്ഥാന സെക്രട്ടറി സാജന്‍ തൊടുകയിൻ്റെ നേതൃത്വത്തിലാണ് ജോസ് കെ മാണി വിഭാഗത്തിൻ്റെ ആഘോഷപരിപാടികള്‍ നടക്കുക. എല്ലാ ജില്ലകളിലും യൂത്ത് ഫ്രണ്ട് രണ്ടായെന്നാണ് സൂചന.

തിരുവനന്തപുരത്ത് യൂത്ത് ഫ്രണ്ടിൻ്റെ ഔദ്യോഗിക വിഭാഗമാണ് യോഗം ചേര്‍ന്നതെന്ന് പി ജെ ജോസഫ് പറഞ്ഞു. വിമതരുടെ പ്രവര്‍ത്തികള്‍ ശ്രദ്ധിക്കേണ്ട കാര്യമില്ല. ചെയര്‍മാൻ തെരഞ്ഞെടുപ്പുപോലെ ആള്‍ക്കൂട്ടമാണ് യൂത്ത് ഫ്രണ്ട് പ്രസിഡൻ്റിനെയും തെരഞ്ഞെടുത്തതെന്ന് അദ്ദേഹം കുറ്റപ്പെടുത്തി. സംസ്ഥാന സമിതിയിൽ ഭൂരിപക്ഷം തങ്ങള്‍ക്കാണെന്നും അദ്ദേഹം കൂട്ടിച്ചേര്‍ത്തു.