നസിറുദ്ദീന്‍ വധം: എസ്ഡിപിഐ പ്രവര്‍ത്തകര്‍ക്ക് ജീവപര്യന്തം

കോഴിക്കോട്: കുറ്റ‍്യാടിയിലെ യൂത്ത് ലീഗ് പ്രവര്‍ത്തകന്‍ നസിറുദ്ധീനെ കൊലപ്പെടുത്തിയ കേസില്‍ ഒന്നും രണ്ടും പ്രതികള്‍ക്ക് കോടതി ജീവപര്യന്തം ശിക്ഷ വിധിച്ചു. കേസില്‍ കുറ്റക്കാരെന്ന് കോടതി കണ്ടെത്തിയതിനെ തുടര്‍ന്നാണ് ഒന്നാം പ്രതി കപ്പച്ചേരി ബഷീര്‍, രണ്ടാം പ്രതി കൊല്ലിയില്‍ അന്ത്രു എന്നിവര്‍ക്ക് കോഴിക്കോട് അഡീഷണല്‍ ജില്ലാ സെഷന്‍സ് കോടതി ജീവപര്യന്തം ശിക്ഷ വിധിച്ചത്. രണ്ട് പ്രതികള്‍ക്കും കോടതി ഒരു ലക്ഷം രൂപ വീതം പിഴയും വിധിച്ചു.

കൊല നടത്തിയ ഒന്നാം പ്രതി കപ്പച്ചേരി ബഷീര്‍ പ്രദേശത്തെ എസ്‍ഡിപിഐ പ്രവര്‍ത്തകനാണ്. ഒന്നും രണ്ടും പ്രതികളൊഴികെ ബാക്കി അഞ്ച് പ്രതികളെ കോടതി വെറുതേ വിട്ടു. 2016 ജൂലൈ 15ന് രാത്രിയിലാണ് പുത്തലത്ത് അനന്തോട്ട് വെച്ച് ബൈക്കിലെത്തിയ നസിറുദ്ധീനെ പ്രതികള്‍ തടഞ്ഞുനിര്‍ത്തുകയും കുത്തിക്കൊലപ്പെടുത്തുകയും ചെയ്യുകയായിരുന്നു. ഒന്നാം പ്രതി കപ്പച്ചേരി ബഷീര്‍, രണ്ടാം പ്രതി കൊല്ലിയില്‍ അന്ത്രു എന്നിവര്‍ക്കെതിരെ നേരത്തേ കൊലക്കുറ്റം ചുമത്തിയിരിരുന്നു.