വാട്‍‍സാപ്പിൽ വ്യാജസന്ദേശമയച്ച് യുവതിയുടെ വിവാഹം മുടക്കി

ആലുവ: വാട്‍‍സാപ്പ് വഴി തെറ്റായ സന്ദേശം പ്രചരിപ്പിച്ച് യുവാവ് ആലുവ സ്വദേശിയായ യുവതിയുടെ കല്യാണം മുടക്കി. സംഭവത്തിൽ ചേലക്കുളം കാവുങ്ങപറമ്പ് കീടേത്ത് വീട്ടിൽ ഷിഹാബി (35)നെ പോലീസ് അറസ്റ്റ് ചെയ്തു. മാര്‍ച്ച് 26-ാം തീയതിയാണ് സംഭവം.

കോളേജ് വിദ്യാര്‍ഥിനിയായ എടത്തല സ്വദേശിനി സഹപാഠിയോടൊപ്പം ആലുവ കെഎസ്ആര്‍ടിസി ബസ് സ്റ്റാൻഡിൽ സംസാരിച്ചു നിൽക്കുന്ന ദൃശ്യങ്ങളാണ് പ്രതി പകര്‍ത്തിയതെന്ന് പോലീസ് പറയുന്നു. ഇവര്‍ ഒളിച്ചോടാൻ എത്തിയതാണെന്നും വീട്ടുകാരെ അടിയന്തരമായി അറിയിക്കണമെന്നും ആവശ്യപ്പെട്ടുകൊണ്ട് വോയ്സ് ക്ലിപ്പ് ഉള്‍പ്പെടെയുള്ള സന്ദേശമാണ് പ്രതി പ്രചരിപ്പിച്ചത്.

വിദേശരാജ്യങ്ങളിലുള്‍പ്പെടെ വാട്‍‍സാപ്പ് വഴി സന്ദേശം പ്രചരിച്ചതോടെ യുവതിയുടെ നേരത്തെ നിശ്ചയിച്ച വിവാഹം മുടങ്ങുകയായിരുന്നു. യുവതിയുടെ പരാതിയെത്തുടര്‍ന്നാണ് പോലീസ് അന്വേഷണം നടത്തി പ്രതിയെ പിടികൂടിയത്.

ആലുവ സി.ഐ. വിശാല്‍ ജോണ്‍സണ്‍, എസ്.ഐ. എം.എസ്. രാജന്‍, എ.എസ്.ഐ. രാജീവ്, സി.പി.ഒ. മാരായ നവാബ്, മുഹമ്മദ് അലി, ഷമീര്‍ എന്നിവരും അന്വേഷണസംഘത്തില്‍ ഉണ്ടായിരുന്നു.