ഷാര്‍ജയില്‍ 29 കാരന്‍ അമ്മയെ കഴുത്തറുത്ത് കൊന്നു

ഷാര്‍ജ: 29 കാരന്‍ അമ്മയെ കഴുത്തറുത്ത് കൊലപ്പെടുത്തി. അല്‍ മമ്‌നാസ് മേഖലയിലാണ് സംഭവം റിപ്പോര്‍ട്ട് ചെയ്യപ്പെട്ടിരിക്കുന്നത്. കൊല നടത്തി പത്തു ദിവസങ്ങള്‍ക്ക് ശേഷം യുവാവ് താമസിച്ചിരുന്ന അപ്പാര്‍ട്ട്‍മെന്‍റില്‍ നിന്നു തന്നെയാണ് അഴുകിത്തുടങ്ങിയ ജ‍ഡം കണ്ടെത്തിയത്. യുവാവ് മാനസികരോഗിയാണെന്നാണ് പോലീസ് നിഗമനം.

അമ്മ ദുര്‍മന്ത്രവാദം ചെയ്യുമായിരുന്നു എന്ന് ഒരു ബന്ധു പറഞ്ഞതു കൊണ്ടാണ് താന്‍ കൊന്നതെന്ന് യുവാവ് പോലീസിനോട് സമ്മതിച്ചിട്ടുണ്ട്. ദുര്‍മന്ത്രവാദം നടത്തിയെന്നതിന്റെ തെളിവുകള്‍ തനിക്ക് ലഭിച്ചിരുന്നു എന്നും യുവാവ് പറഞ്ഞു.

യുവാവിന്‍റെ അമ്മയെ ദിവസങ്ങളായി പുറത്തു കാണാത്തതിനെത്തുടര്‍ന്ന് അയല്‍ക്കാര്‍ പോലീസില്‍ പരാതിപ്പെട്ടിരുന്നു. തുടര്‍ന്ന് പോലീസ് നടത്തിയ അന്വേഷണത്തിലാണ് ശവശരീരം കണ്ടെത്തിയത്. യുവാവിനെ മാനസിക ചികിത്സയ്ക്കായി ഷാര്‍ജിലെ ആശുപത്രിയില്‍ പ്രവേശിപ്പിച്ചിരിക്കുകയാണ്.