ഇന്നും രോഗബാധിതരിലധികവും ഇന്ത്യക്കാർ
കുവൈത്തിൽ ഇന്ന് രോഗം സ്ഥിരീകരിച്ചവരിലും കൂടുതൽ പേർ ഇന്ത്യക്കാരാണെന്നാണ് റിപ്പോർട്ടുകൾ വ്യക്തമാക്കുന്നത്. ആരോഗ്യ മന്ത്രാലയം പുറത്തുവിട്ട കണക്കുകൾ പ്രകാരം 319 ഇന്ത്യക്കാർക്കാണ് ഇന്ന് ഇവിടെ കൊവിഡ് സ്ഥിരീകരിച്ചത്. രോഗം സ്ഥിരീകരിച്ചവരിൽ ഈജിപ്തിൽ നിന്നുള്ള 196 പേരും ബംഗ്ലാദേശിൽ നിന്നുള്ള 111 പേരുമുണ്ട്. 139 കുവൈത്തി പൗരന്മാർക്കും ഇന്ന് രോഗം സ്ഥിരീകരിച്ചിട്ടുണ്ടെന്നും മന്ത്രാലയം വ്യക്തമാക്കുന്നു.
ഇന്നത്തെ പോസിറ്റീവ് കേസുകളിലും മുന്നിൽ ഫർവാനിയ ഗവർണറേറ്റ്
ഫർവാനിയ ഗവർണറേറ്റിൽ ഇന്ന് 119 കൊവിഡ് കേസുകളാണ് റിപ്പോർട്ട് ചെയ്തത്. ലീബ് അൽ ശുയൂഖിൽ 77 പേർക്കും ഖൈത്താനിൽ 67 പേർക്കും സൽമിയയിൽ 66 പേർക്കും കൊവിഡ് സ്ഥിരീകരിച്ചിട്ടുണ്ട്. ഇന്നലെ 1041 പേർക്ക് കൊവിഡ് സ്ഥിരീകരിച്ചപ്പോളും മുന്നിൽ ഫർവാനിയ ഗവർണറേറ്റായിരുന്നു. 383 പേർക്കായിരുന്നു ഇന്നലെ കൊവിഡ് സ്ഥിരീകരിച്ചത്. ഹവല്ലി ഗവർണറേറ്റ് 173, അഹ്മദി ഗവർണറേറ്റ് 276, ജഹ്റ ഗവർണറേറ്റ് 103, കാപിറ്റൽ ഗവർണറേറ്റ് 107 എന്നിങ്ങനെയാണ് പുതിയ കേസുകൾ. റെസിഡൻഷ്യൽ ഏരിയ അടിസ്ഥാനമാക്കിയാൽ ജലീബ് അൽ ശുയൂഖ് 91, ഫർവാനിയ 116, മഹബൂല 79, ഖൈത്താൻ 91 എന്നിങ്ങനെയായിരുന്നു ഇന്നലെ റിപ്പോർട്ട് ചെയ്ത മറ്റു കേസുകൾ.
കഴിഞ്ഞദിവസങ്ങളിലും മൂന്നൂറിൽ കൂടുതൽ ഇന്ത്യക്കാർക്ക് രോഗബാധ
കഴിഞ്ഞദിവസങ്ങളിലും കുവൈറ്റിൽ മുന്നൂറിലധികം ഇന്ത്യക്കാർക്ക് കൊവിഡ് സ്ഥിരീകരിച്ചിരുന്നു. ഇന്ന് രോഗം സ്ഥിരീകരിച്ച 955 പേരിൽ 319 പേരും ഇന്ത്യക്കാരാണ്. ഇന്നലെ 1041 പേർക്ക് രാജ്യത്ത് രോഗം സ്ഥിരീകരിച്ചപ്പോൾ 325 പേരായിരുന്നു ഇന്ത്യക്കാർ, 211 കുവൈത്ത് പൗരന്മാരും ഇന്നലെ പട്ടികയിലുണ്ടായിരുന്നു. ബുധനാഴ്ച കുവൈത്തിൽ സ്ഥിരീകരിച്ച കൊവിഡ് കേസുകൾ 804 ആയിരുന്നു, അന്ന് 261 ഇന്ത്യക്കാരായിരുന്നു പട്ടികയിലുണ്ടായിരുന്നത്. ചൊവ്വാഴ്ച 1073 പേർക്ക് രോഗം സ്ഥിരീകരിച്ചപ്പോൾ 332 പേരും ഇന്ത്യക്കാരായിരുന്നു.
കൊവിഡ് ബാധിച്ച് ഒരു മലയാളി കൂടി കുവൈത്തിൽ മരിച്ചു
കൊവിഡ്-19 സ്ഥിരീകരിച്ച തിരുവനന്തപുരം സ്വദേശി ഇന്ന് കുവൈത്തിൽ മരിച്ചിരുന്നു. പീച്ചോട്ടുകോണം വെങ്ങാനൂർ സുകുമാരൻ മാനുവേൽ (54) ആണ് മരിച്ചത്. അബ്ബാസിയയിൽ താമസിച്ചിരുന്ന ഇദ്ദേഹം ഫർവാനിയ ആശുപത്രിയിലാണ് മരിച്ചത്. ഗള്‍ഫ് രാജ്യങ്ങളിൽ മൂന്ന് മലയാളികള്‍ കൂടി കൊവിഡ് ബാധിച്ച് മരിച്ചതോടെ ഗൾഫിൽ കൊവിഡ് ബാധിച്ച് മരിച്ച മലയാളികളുടെ എണ്ണം 98 ആയി ഉയർന്നു.