ദുബായ് വിമാനത്താവളം ഏറ്റവും അധികം ഉപയോഗിച്ചത് ഇന്ത്യക്കാർ

ദുബായ്: ലോകത്ത് ഏറ്റവും അധികം യാത്രക്കാർ വന്നുപോകുന്ന ദുബായ് വിമാനത്താവളം ഏറ്റവും അധികം ഉപയോഗിച്ചത് ഇന്ത്യക്കാർ. ഈ വർഷം മാത്രം ഈ വിമാനത്താവളത്തിലൂടെ നാലുകോടി പതിനഞ്ച് ലക്ഷത്തോളം ആളുകൾ സഞ്ചരിച്ചു. അതിൽ 57 ലക്ഷം യാത്രക്കാർ ഇന്ത്യയിൽനിന്നുള്ളവരാണ്.

ലണ്ടൻ കഴിഞ്ഞാൽ മുംബൈ വിമാനത്താവളത്തിലൂടെയാണ് ഏറ്റവും അധികം യാത്രക്കാർ സഞ്ചരിച്ചത്. ലണ്ടനിലേക്ക് 16 ലക്ഷം യാത്രക്കാർ സഞ്ചരിച്ചപ്പോൾ മുംബൈലേക്ക് 11 ലക്ഷം പേർ യാത്രചെയ്തു.

ഒന്നേ മുക്കാൽ ലക്ഷത്തിലധികം യാത്രാ വിമാനങ്ങളാണ് ദുബായ് വിമാനത്താവളത്തിലൂടെ കടന്നുപോയത്. പത്തുലക്ഷത്തിലധികം ടൺ ചരക്കും വിമാനത്താവളത്തിലൂടെ വിനിമയം ചെയ്തു. ബാഗുകളുടെ എണ്ണം മാത്രം മൂന്നരക്കോടിയോളം വരും. 4,12,77,749 യാത്രക്കാരാണ് ഈ വർഷം ആദ്യപകുതിയിൽ വിമാനത്താവളത്തിലൂടെ കടന്നുപോയത്. ഏപ്രിൽ 16 മുതൽ മേയ് 30 വരെ വിമാനത്താവളത്തിലെ രണ്ട് റൺവേകൾ അറ്റകുറ്റപ്പണിക്കായി അടച്ചിട്ടെങ്കിലും യാത്രക്കാരുടെ എണ്ണത്തിൽ 5.6 ശതമാനം കുറവ് മാത്രമാണ് ഉണ്ടായത്. എങ്കിലും ഒന്നാം സ്ഥാനം നിലനിർത്താൻ കഴിഞ്ഞു.

ഇന്ത്യക്കാർക്കു പിന്നാലെ സൗദി പൗരന്മാരാണ് വിമാനത്താവളം ഏറ്റവും അധികമായി ഉപയോഗിച്ചത്, 31 ലക്ഷം പേർ. തൊട്ടുപിന്നാലെ 28 ലക്ഷം ബ്രിട്ടീഷുകരും 19 ലക്ഷം പാകിസ്ഥാനികളും 15 ലക്ഷം അമേരിക്കക്കാരും ദുബായ് വിമാനത്താവളത്തിലൂടെ യാത്രചെയ്തു. 12 ലക്ഷം ചൈനക്കാരും ഈ വിമാനത്താവളത്തിലൂടെയുള്ള യാത്രക്കാരായി. നിലവിൽ സ്മാർട്ട് ഗേറ്റ് ഉപയോഗിക്കുന്നതിനാൽ എമിഗ്രേഷൻ സമയത്തിൽ 25 ശതമാനം കുറവ് വന്നിട്ടുണ്ട്.