കൊവിഡ്-19։ യാത്രാവിലക്ക് നീട്ടാൻ തയ്യാറെടുത്ത് അബുദാബി

അബുദാബി։ കൊവിഡ്-19 രോഗബാധ ഉയരുന്ന സാഹചര്യത്തില്‍ യാത്രാവിലക്ക് അടക്കമുള്ള നിയന്ത്രണങ്ങള്‍ കര്‍ശനമാക്കി യുഎഇ ഭരണകൂടം. രണ്ടാഴ്ചത്തേക്കോ 10 ദിവസത്തേക്കോ നീട്ടണമെന്നാണ് ഇപ്പോള്‍ അബുദാബി പോലീസ് നിര്‍ദ്ദേശിച്ചിരിക്കുന്നത്. കൂടുതല്‍ നിയന്ത്രണങ്ങള്‍ പരിശോധനാ ഫലത്തിന്റെ അടിസ്ഥാനത്തില്ഡ നല്‍കുമെന്നാണ് അല്‍ ബായന്‍ റിപ്പോര്‍ട്ട് ചെയ്യുന്നത്.

Also Read : കൊടുങ്കാറ്റില്‍ നിന്ന് സുരക്ഷിതരാകാം; ചെയ്യേണ്ടതും ചെയ്യരുതാത്തതും

നിയന്ത്രണം ഏര്‍പ്പെടുത്തിയിരിക്കുന്ന ആദ്യ വാരത്തിലെ പരിശോധനഫലങ്ങളുടെ അടിസ്ഥാനത്തില്‍ അബുദാബി എമര്‍ജൻസി ആന്റ് ക്രൈസിസ് മാനേജ്മെന്റ് കമ്മിറ്റിയാണ് നിയന്ത്രണങ്ങള്‍ പ്രഖ്യാപിക്കുക. അബുദാബി ഡയറക്ടര്‍ ജനറല്‍ ഓഫ് പോലീസ് മേജര്‍ ജനറല്‍ മക്തൂം അലി അല്‍ ഷരീഫിയാണ് ഇക്കാര്യം അറിയിച്ചത്.

അധികൃതര്‍ നല്‍കിയിരിക്കുന്ന നിയന്ത്രണങ്ങള്‍ 90 ശതമാനം ജനങ്ങളും അനുസരിക്കുന്നുണ്ടെന്നും അദ്ദേഹം അറിയിച്ചു.

അതേസമയം, അവശ്യ മേഖലകളിൽ ജോലി ചെയ്യുന്ന ജീവനക്കാർ, രോഗികളുമായി ആശുപത്രി യാത്ര നടത്തുന്നവർ, ആവശ്യമായ സാധനങ്ങൾ കയറ്റുന്നവർ തുടങ്ങിയവരെ ഇതിൽ നിന്ന് ഒഴിവാക്കിയിട്ടുണ്ട്. കഴിഞ്ഞയാഴ്ച നൈറ്റ് കർഫ്യൂവിലും യുഎഇ ഭരണകൂടം മാറ്റം വരുത്തിയിട്ടുണ്ട്. രാത്രി 10 മുതൽ രാവിലെ 6 വരെയുണ്ടായ കർഫ്യു രാത്രി 11 മുതൽ 6 വരെയാണ് പുതുക്കി നിശ്ചയിച്ചത്.

Also Read : നിയന്ത്രണങ്ങള്‍ക്ക് വന്‍ ഇളവ്; ദുബായിലെ മാളുകള്‍ ഇന്ന് മുതല്‍ പൂര്‍ണമായും തുറക്കും

എന്നാല്‍, ദുബായില്‍ മാളുകള്‍ അടക്കമുള്ളവ പൂര്‍ണമായും തുറക്കുന്നതിന് ഭരണകൂടം അനുമതി നല്‍കി. സാമൂഹിക അകലം പാലിച്ചും മാസ്കുകള്‍ ധരിച്ചുമാകണം ഇവിടങ്ങളില്‍ എത്താൻ എന്നും ഭരണകൂടം നിര്‍ദ്ദേശിച്ചിട്ടുണ്ട്.

ദുബായിൽ കഴിഞ്ഞ രണ്ടാഴ്ചയായി ഷോപ്പിങ് മാളുകളും മറ്റ് സ്വകാര്യ വ്യവസായങ്ങളും 50 ശതമാനം ആളുകളുമായി പ്രവര്‍ത്തനം നടത്തിയിരുന്നു. എന്നാല്‍ ഇപ്പോള്‍ അത് 100 ശതമാനം ആക്കുവാനാണ് പദ്ധതിയിട്ടിരിക്കുന്നത് എന്ന് ഇന്നലെ ദുബായ് മീഡിയാ ഹൗസ് അറിയിച്ചിരുന്നു.