ആഭ്യന്തര വിമാന സർവീസുകള്‍ തുടങ്ങാനൊരുങ്ങി സൗദി അറേബ്യ

ജിദ്ദ։ കൊവിഡ്-19 രോഗബാധയെ തുടര്‍ന്ന് പ്രഖ്യാപിച്ച നിയന്ത്രണങ്ങള്‍ക്ക് ഇളവ് വരുത്തി സൗദി അറേബ്യ. ഇതിന്റെ ആദ്യഘട്ടമായി ഞായറാഴ്ച ആഭ്യന്തര വിമാന സര്‍വീസുകള്‍ പുനരാരംഭിച്ചു. ആദ്യഘട്ടത്തില്‍ നൂറ് വിമാനങ്ങള്‍സൗദിയില്‍ നിന്നും പറന്നുയരുമെന്ന് ഭരണകൂടം അറിയിച്ചു.

കുറച്ച് മാസങ്ങള്‍ക്കുള്ളില്‍ ഗതാഗത സൗകര്യങ്ങളെല്ലാം സാധാരണരീതിയിലേക്ക് മടങ്ങി വരുമെന്ന് ഗതാഗത മന്ത്രി സലാഹ ബിന്‍ നാസര്‍ അല്‍ ജസീര്‍ പറഞ്ഞു.

Also Read : ലോക്ക് ഡൗൺ ജൂണ്‍ 30 വരെ നീട്ടി തമിഴ്നാട്։ 50 ശതമാനം പൊതുഗതാഗതം പുനസ്ഥാപിക്കും

ഈ മഹാമാരി രാജ്യത്തെ ഗതാഗത സൗകര്യത്തെ സാരമായ രീതിയില്‍ മരവിപ്പിച്ചിരുന്നു. ഈ സമയത്ത് പ്രവാസികളുടെ പുനരധിവാസത്തിനുള്ള വിമാന സര്‍വീസുകള്‍ മാത്രമാണ് നടന്നിരുന്നത് എന്നും മന്ത്രി അറബ് മാധ്യമത്തോട് പറഞ്ഞു.

ഇതിന്റെ ഭാഗമായി കിങ്ങ് അബ്ദുളസീസ് അന്താരാഷ്ട്ര വിമാനത്താവളത്തിലെ ഒന്നാം ടെര്‍മിനലില്‍ മന്ത്രി സന്ദര്‍ശനം നടത്തി. മന്ത്രി ഇതുമായി ബന്ധപ്പെട്ട അധികൃതരുമായി ചര്‍ച്ചകള്‍ നടത്തി കൊണ്ടിരിക്കുകയാണ്.

എല്ലാവിധ മുൻകരുതലുകളും എടുത്തുവേണം യാത്രക്കാര്‍ എത്തേണ്ടത് എന്ന് നിര്‍ദ്ദേശങ്ങള്‍ നല്‍കിയിട്ടുണ്ട്. കൊറോണ വൈറസ് വ്യാപിക്കാതിരിക്കുന്നതിനു വേണ്ടിയാണ് ഇത്തരത്തില്‍ നിര്‍ദ്ദേശം മുന്നോട്ട് വച്ചിരിക്കുന്നത്.

Also Read : സംസ്ഥാനത്ത് ഇന്ന് ശുചീകരണ ദിനം; പുതിയ ലോക്ക് ഡൗണ്‍ മാര്‍ഗ്ഗ നിര്‍ദ്ദേശങ്ങള്‍ നാളെ

യാത്രയ്ക്ക് രണ്ട് മണിക്കൂര്‍ മുന്‍പ് വിമാനത്താവളത്തില്‍ എത്തണമെന്നും നിര്‍ദ്ദേശിച്ചിട്ടുണ്ട്. 38 ഡിഗ്രി ശരീരോഷ്മാവില്‍ അധികമുള്ള ആര്‍ക്കും ടെര്‍മിനലില്‍ കയറുവാന്‍ അനുമതി നല്‍കില്ല. ഇതിന് പുറമെ, വിമാനത്താവളത്തിലും വിമാനത്തിലും മാസ്ക് നിര്‍ബന്ധമായും ധരിച്ചിരിക്കണമെന്ന് അധിക‍ൃതര്‍ നിര്‍ദ്ദേശിച്ചിട്ടുണ്ട്. രണ്ട് മീറ്റര്‍ സാമൂഹിക അകലം കൃത്യമായി പാലിക്കണമെന്നും ജനറല്‍ അതോറിറ്റി ഓഫ് സിവിൽ ഏവിയേഷൻ പുറത്തിറക്കിയ മാര്‍ഗ്ഗ നിര്‍ദ്ദേശത്തില്‍ വ്യക്തമാക്കുന്നു.