ദുബായി: ബഹ്റൈനിൽ 317 പേർക്ക് കൂടി കൊവിഡ്-19 സ്ഥിരീകരിച്ചു. ഇതോടെ രാജ്യത്തെ രോഗബാധിതരുടെ എണ്ണം 18,544 ആയി ഉയർന്നെന്ന് ആരോഗ്യ മന്ത്രാലയം വ്യക്തമാക്കി. കഴിഞ്ഞ 24 മണിക്കൂറിനുള്ളിൽ രാജ്യത്ത് 6,779 കൊവിഡ് പരിശോധനകളായിരുന്നു നടത്തിയത്. ഇതോടെ ആകെ പരിശോധനകളുടെ എണ്ണം 425,192 ആയി.
ഇന്ന് രോഗം സ്ഥിരീകരിച്ചവരിൽ 51 പേർ പ്രവാസി തൊഴിലാളികളാണ്. 164 പേർ നേരത്തെ രോഗം സ്ഥിരീകരിച്ചവരുമായി നേരിട്ട് സമ്പർക്കം പുലർത്തിയവരും. ഇന്നത്തെ രോഗബാധിതരിൽ രണ്ട് പേർ മാത്രമാണ് വിദേശത്ത് നിന്നെത്തിയതെന്നും ആരോഗ്യ വകുപ്പ് പുറത്തുവിട്ട കണക്കുകൾ വ്യക്തമാക്കുന്നു.
Also Read: നിതിന് മരിക്കുന്നില്ല; രക്തദാന ക്യാമ്പ് നടത്തി സുഹൃത്തുക്കള്
അതേസമയം കഴിഞ്ഞ 24 മണിക്കൂറിനിടെ രണ്ട് മരണങ്ങളും റിപ്പോർട്ട് ചെയ്തിട്ടുണ്ട്. ഇതോടെ രാജ്യത്തെ ആകെ മരണസംഖ്യ 45 ആയി ഉയർന്നു. മരിച്ചവർ രണ്ട് പേരും വിദേശികളാണ്. ഒരാൾ 35 കാരനും മറ്റേയാൾ 39 കാരനുമാണെന്നും ആരോഗ്യവകുപ്പ് വ്യക്തമാക്കി. അതേസമയം 379 പേർക്ക് കൂടി രോഗമുക്തി ലഭിച്ചിട്ടുണ്ട്. ഇതോടെ രോഗമുക്തരായവരുടെ എണ്ണം 13,197 ആയി ഉയർന്നു.
നിലവിൽ രോഗം ബാധിച്ച് ആശുപത്രികളിൽ ചികിത്സയിലുള്ളത് 140 പേരാണ്. ഇതിൽ 18 പേരുടെ നില ഗുരുതരമാണ്. നിലവിലുള്ള 5,304 ആക്ടീവ് കേസുകളിൽ 5,286 പേരുടെ ആരോഗ്യ നില തൃപ്തികരമാണെന്നും ആരോഗ്യവകുപ്പ് പുറത്തുവിട്ട കണക്കുകൾ പറയുന്നു.