യുഎഇയിൽ നിന്ന് 300 കോടി സമാഹരിക്കാൻ മുഖ്യമന്ത്രിയുടെ ആഹ്വാനം

ദുബായ്: പ്രളയശേഷം കേരളത്തിന്‍റെ പുനര്‍നിര്‍മാണത്തിനായി യുഎഇയിൽ നിന്ന് 300 കോടി രൂപ സമാഹരിക്കാൻ പിണറായി വിജയന്‍റെ ആഹ്വാനം. നാല് ദിവസത്തെ യുഎഇ പര്യടനത്തിന് ശേഷമായിരുന്നു ഞായറാഴ്ച ഉച്ചയ്ക്ക് നടന്ന അവലോകനയോഗത്തിൽ മുഖ്യമന്ത്രി നിര്‍ദേശം മുന്നോട്ട് വെച്ചത്. യുഎഇയിലെ നോര്‍ക്ക, ലോകകേരളസഭാ അംഗങ്ങളും പ്രമുഖ പ്രവാസിസംഘടനകളുടെ പ്രതിനിധികളും യോഗത്തിൽ പങ്കെടുത്തു.

ഇതുവരെ നല്‍കിയ തുക ഇതിൽ ചേര്‍ക്കേണ്ടെന്നും പുതുതായി 300 കോടി രൂപ സമാഹരിക്കണമെന്നുമാണ് മുഖ്യമന്ത്രിയുടെ നിര്‍ദേശം. അടുത്ത ജൂൺ മാസത്തോടെ ലക്ഷ്യം കൈവരിക്കാനാണ് ശ്രമിക്കേണ്ടത്. ഡിസംബര്‍ 31, ജനുവരി 31 എന്നീ തീയതികളിൽ ആദ്യ ഗഡു പണം സമാഹരിക്കണം.

യുഎഇയിൽ പ്രവര്‍ത്തിക്കുന്ന റെഡ് ക്രസന്‍റ് ഉള്‍പ്പെടെയുള്ള സന്നദ്ധസംഘടനകള്‍ കേരളത്തിന്‍റെ പുനര്‍നിര്‍മാണത്തിന് വിഭവങ്ങള്‍ സമാഹരിക്കുന്നുണ്ട്. ഇതിനു പുറമെയാണ് പ്രവാസികളിൽ നിന്ന് പണം സ്വരൂപിക്കുക. അടുത്ത തലമുറയ്ക്ക് വേണ്ടിയുള്ള ഈ യത്നത്തിൽ എല്ലാവരും പങ്കാളികളാകണമെന്നും എല്ലാ വിഭാഗക്കാരെയും ഇതിനായി സഹകരിപ്പിക്കണമെന്നും മുഖ്യമന്ത്രി പറഞ്ഞു. നവകേരളനിര്‍മാണത്തിന് തടസ്സം നില്‍ക്കുന്നവര്‍ക്ക് സൃഷ്ടിപരമായ നിര്‍മാണത്തിലൂടെ മറുപടി നല്‍കണണെന്നും മുഖ്യമന്ത്രി ഓര്‍മിപ്പിച്ചു.

അമേരിക്കയിലെ മലയാളികളിൽ നിന്ന് 150 കോടി രൂപയാണ് പ്രതീക്ഷിക്കുന്നത്. എന്നാൽ അതിലും മലയാളികളുള്ള സ്ഥലമാണ് യുഎഇ. സാധാരണക്കാരിൽ നിന്ന് പത്തുദിര്‍ഹമെങ്കിൽ പത്തുദിര്‍ഹം പോലും ഇതിലേയ്ക്ക് സമാഹരിക്കണമെന്നും മുഖ്യമന്ത്രി പറഞ്ഞു.

വെള്ളിയാഴ്ചകളിൽ ഓരോ എമിറേറ്റിലും അവലോകനയോഗം ചേര്‍ന്ന് പ്രവര്‍ത്തനം വിലയിരുത്താനും പ്രാദേശികകൂട്ടായ്മകളെ വിശ്വാസത്തിലെടുത്ത് പ്രവര്‍ത്തനങ്ങള്‍ ഏകോപിപ്പിക്കാനും അദ്ദേഹം ആഹ്വാനം ചെയ്തു.

മുഖ്യമന്ത്രിയുടെ പ്രളയദുരിതാശ്വാസനിധിയെക്കുറിച്ച് അടിസ്ഥാനപരമായ കാര്യങ്ങള്‍ പ്രചരിക്കുന്നുണ്ടെന്നും ഇത് അവഗണിക്കാതെ യഥാര്‍ഥവസ്തുതകള്‍ പറഞ്ഞ് അവരെ ബോധവത്കരിക്കണമെന്നും മുഖ്യമന്ത്രി ആവശ്യപ്പെട്ടു.

നോര്‍ക്ക വൈസ് ചെയര്‍മാൻ എംഎ യൂസഫലി, പ്രിൻസിപ്പൽ സെക്രട്ടറി ഡോ. ഇളങ്കോവൻ, മുഖ്യമന്ത്രിയുടെ മാധ്യമ ഉപദേഷ്ടാവ് ജോൺ ബ്രിട്ടാസ്, ആസ്റ്റര്‍ ഡിഎം ഹെൽത്ത്കെയര്‍ ചെയര്‍മാൻ ഡോ. ആസാദ് മൂപ്പൻ, ലുലു എക്സ്ചേഞ്ച് എംഡി അദീബ് അഹമ്മദ് തുടങ്ങിയവരും യോഗത്തിൽ സംബന്ധിച്ചു. യുഎഇ സന്ദര്‍ശനം പൂര്‍ത്തിയാക്കി മുഖ്യമന്ത്രി തിരുവനന്തപുരത്തേയ്ക്ക് മടങ്ങി.