അനധികൃത കുടിയേറ്റക്കാരെ സംരക്ഷിക്കരുത്; നിയമം ലംഘിച്ചാൽ പിഴ

ദുബായ്: അനധികൃത കുടിയേറ്റക്കാരെ സംരക്ഷിക്കുകയോ ജോലി നൽകുകയോ ചെയ്യരുതെന്ന് ബ്രിഗേഡിയർ ജനറൽ ഖലഫ് അൽ ഗൈഥ് മുന്നറിയിപ്പ് നൽകി. നിയമ ലംഘകർക്ക് 100,000 ദിർഹം പിഴ ചുമത്തുമെന്നും അദ്ദേഹം പറഞ്ഞു.

നേരത്തെ അനധികൃത കുടിയേറ്റക്കാർക്ക് യുഎഇ പൊതുമാപ്പ് പ്രഖ്യാപിച്ചിരുന്നു. താമസ-കുടിയേറ്റ രേഖകകൾ ശരിയാക്കാനും പിഴയോ, ശിക്ഷയോ ഇല്ലാതെ വിസാ സ്റ്റാറ്റസ് ശരിയാക്കാനുമായിരുന്നു അവസരം. അഞ്ച് മാസത്തോളം പൊതുമാപ്പ് നിലനിന്നിരുന്നു.

അൽ അവീർ ജയിൽ സന്ദർശനത്തിന് പുതിയ സമയക്രമം

അതേസമയം, അൽ അവീറിലെ എമിഗ്രേഷൻ ജയിലിൽ തടവുകാരെ സന്ദർശിക്കുന്നതിന് പുതിയ സമയക്രമം നിലവിൽ വന്നു. ദുബായ് ജനറൽ ഡയറക്ട്രേറ്റ് ഓഫ് റസിഡൻസി ആന്റ് ഫോറിൻ അഫയേഴ്സ് മേധാവി മേജർ ജനറൽ മുഹമ്മദ് അഹ്മദ് അൽ മറിയാണ് പുതിയ സമയക്രമം പ്രഖ്യാപിച്ചത്.

എല്ലാ വെള്ളിയാഴ്ചയും രാവിലെ എട്ടുമുതൽ 11 വരെയുള്ള സമയത്ത് പുരുഷന്മാരെ സന്ദർശിക്കാം. ശനിയാഴ്ച രാവിലെ എട്ടുമുതൽ 11 വരെയാണ് സ്ത്രീകളെ സന്ദർശിക്കാനുള്ള സമയം. നേരത്തെ വെള്ളി, ശനി രാവിലെ ഒമ്പത് മുതൽ 12 വരെ പുരുഷന്മാരെയും വൈകിട്ട് നാലുമുതൽ ആറുവരെ സ്ത്രീകളെയും സന്ദർശിക്കാൻ കഴിഞ്ഞിരുന്നു.