വാഹനം ഓടിക്കുന്ന രക്ഷിതാക്കളുടെ ശ്രദ്ധയ്ക്ക്; ഇക്കാര്യം ശ്രദ്ധിച്ചില്ലെങ്കിൽ പിടിവീഴും

ദുബായ്: വാഹനങ്ങളിൽ കുട്ടികളുമായി യാത്രചെയ്യുന്ന രക്ഷിതാക്കൾക്ക് മുന്നറിയിപ്പുമായി ദുബായ് പോലീസ്. ശൈഖ് മുഹമ്മദ് ബിൻ സയിദ് ഹൈവേയിലും ശൈഖ് സയിദ് റോഡിലുമുണ്ടായ രണ്ടുവീതം അപകടങ്ങൾ ചൂണ്ടിക്കാട്ടിയാണ് പോലീസ് മുന്നറിയിപ്പ് നൽകിയത്.


10 വയസിനു താഴെയുള്ള എല്ലാ കുട്ടികളേയും വാഹനത്തിന്റെ പിൻസീറ്റിലാണ് ഇരുത്തേണ്ടത്. സീറ്റ് ബെൽറ്റ് ഉപയോഗിച്ച് കുട്ടിയുടെ സുരക്ഷ ഉറപ്പാക്കണം. കുട്ടിക്ക് 145 സെന്റീമീറ്റർ വളർച്ച ഉണ്ടാകുന്നതുവരെ ഈ നിയമം പാലിക്കണമെന്നാണ് യുഎഇയിലെ നിയമം വ്യക്തമാക്കുന്നത്.

നിയമം പാലിക്കാത്ത രക്ഷിതാക്കളിൽനിന്നും 400 ദിർഹം പിഴ ഈടാക്കും. കൂടാതെ ഡ്രൈവർക്ക് നാല് ബ്ലോക്ക് പോയിന്റും നൽകുമെന്നും പോലീസ് മുന്നറിയിപ്പ് നൽകി.

രക്ഷിതാക്കൾ ശ്രദ്ധിക്കേണ്ട കാര്യങ്ങൾ

• 10 വയസിനു താഴെയുള്ള കുട്ടികളെ മുൻസീറ്റിൽ ഇരുത്തി വാഹനം ഓടിക്കരുത്
• കുട്ടികൾക്കായി പ്രത്യേകം സീറ്റുകളും സുരക്ഷാ ബെൽറ്റുകളും ഉപയോഗിക്കുക
• കുട്ടിയെ കാറിനുള്ളിൽ സ്വതന്ത്രമായി വിടാതിരിക്കുക, സുരക്ഷാ ബെൽറ്റ് ഉപയോഗപ്പെടുത്തുക
• യാത്രക്കാരുടെ മടിയിലോ ഡ്രൈവറുടെ മടിയിലോ കുട്ടിയെ ഇരുത്തി വാഹനം ഓടിക്കാതിരിക്കുക