ഇറാനില്‍ ഭൂചലനം; ഗള്‍ഫ് രാജ്യങ്ങളും കുലുങ്ങി

ദോഹ: ഖത്തര്‍, കുവൈത്ത്, ബഹ്‌റൈന്‍ എന്നീ ഗള്‍ഫ് രാജ്യങ്ങളില്‍ ശക്തമായ ഭൂചലനം. ഇറാനിലുണ്ടായ ഭൂകമ്പത്തിന്റെ പ്രകമ്പനമാണ് ഗള്‍ഫിലുണ്ടായതെന്നാണ് സൂചന. 9.34ലോടെയാണ് നോര്‍ത്ത് ഇൗസ്റ്റ് ബഹ്റൈനില്‍ ഭൂകമ്പമുണ്ടായത്. ഭൂകമ്പമുണ്ടായ വിവരം അധികൃതര്‍ സ്ഥിരീകരിച്ചിട്ടുണ്ട്.

ആളപായം റിപ്പോര്‍ട്ട് ചെയ്യ്തിട്ടില്ല. ബഹ്‌റൈനില്‍ തുടര്‍ ചലനങ്ങള്‍ അനുഭവപ്പെട്ടത് ആശങ്കക്കിടയാക്കി. വലിയ കെട്ടിടങ്ങളില്‍ നിന്ന് ആളുകള്‍ പുറത്തിറങ്ങി. രാവിലെ ഖത്തറിലും ഭൂചലനം അനുഭവപ്പെട്ടു. വെസ്റ്റ് ബേയിലെ കെട്ടിടങ്ങളില്‍ നിന്ന് ആളുകളെ മുന്‍കരുതലെന്നോണം പുറത്തിറക്കി. എന്നാല്‍ ഭയപ്പെടാനൊന്നുമില്ലെന്ന് ഖത്തര്‍ മെറ്ററോളജി വകുപ്പും സിവില്‍ ഏവിയേഷന്‍ വകുപ്പും അറിയിച്ചു.

ഇറാനിലെ ആണവ നിലയത്തിന് തൊട്ടടുത്താണ് ഭൂകമ്പത്തിന്റെ പ്രഭവ കേന്ദ്രം. ഖത്തറിലും ബഹ്‌റൈനിലും കുലുക്കം ശരിക്കും അനുഭവപ്പെട്ടു.

ഇറാനില്‍ അത്യാഹിതങ്ങളൊന്നും റിപ്പോര്‍ട്ട് ചെയ്തിട്ടില്ല. പ്രാദേശിക സമയം രാവിലെ 9.30ഓടെയാണ് ഇറാനില്‍ ഭൂചലനമുണ്ടായത്.