കർക്കിടക വാവ്; പിതൃതർപ്പണത്തിനൊരുങ്ങി പ്രവാസി മലയാളികൾ

കൊച്ചി: കർക്കിടക വാവ് ദിനത്തോടനുബന്ധിച്ച് പിതൃമോക്ഷം തേടി പ്രവാസികൾ ബലിതർപ്പണം നടത്തും. വെള്ളിയാഴ്ച പുലർച്ചെ നാലുമണിക്കാണ് വിവിധയിടങ്ങളിൽ പ്രവാസി മലയാളികൾ പിതൃതർപ്പണം നടത്തുക. പ്രവാസി സംഘടനകളുടെ നേതൃത്വത്തിലാണ് ഇതിനുള്ള സൗകര്യം ഒരുക്കിയിരിക്കുന്നത്.

അമൃതാനന്ദമയി സേവാ സമിതിയുടെ നേതൃത്വത്തിലാണ് ബഹ്റൈനിൽ പിതൃതർപ്പണം സംഘടിപ്പിക്കുന്നത്. വെള്ളിയാഴ്ച പുലർച്ചെ അസ്റി കടപ്പുറത്തുവെച്ചായിരിക്കും പിതൃതർപ്പണം ആരംഭിക്കുക. മുൻകൂടി രജിസ്റ്റർ ചെയ്തവർക്കാണ് ബലിതർപ്പണത്തിനുള്ള സൗകര്യം ഒരുക്കിയിരിക്കുന്നത്.

പേര് രജിസ്റ്റർ ചെയ്തവർ രാവിലെ മൂന്നുമണിക്ക് അസ്റി കടപ്പുറത്ത് എത്തിച്ചേരണം. കഴിഞ്ഞ അഞ്ച് വർഷമായി അമൃത സേവാ സമിതി ബലിതർപ്പണത്തിനുള്ള സൗകര്യം പ്രവാസികൾക്ക് സൗജന്യമായി ഒരുക്കി നൽകുന്നുണ്ട്.

കുവൈത്ത് സിറ്റിയിൽ സേവാദർശൻ ആദ്ധ്യാത്മിക സമിതിയുടെ നേതൃത്വത്തിൽ പുലർച്ചെ നാലുമുതൽ പിതൃതർപ്പണം നടക്കും.

ലോസാഞ്ചലസിൽ ഓറഞ്ച് അവന്യുവിലുള്ള ഗായത്രി ചേതന സെന്ററിലാണ് പിതൃതർപ്പണത്തിനുള്ള സൗകര്യം ഒരുക്കിയിരിക്കുന്നത്. ഓർഗനൈസേഷൻ ഓഫ് ഹിന്ദു മലയാളിയാണ് വാവുബലിക്കുള്ള സൗകര്യം ഒരുക്കിയിരിക്കുന്നത്. ഒൻപതുമണിക്കാണ് കർമ്മം ആരംഭിക്കുക. നേരത്തെ രജിസ്റ്റർ ചെയ്തവർക്കാണ് ബലിതർപ്പണം നടത്താനാകുക.

ലണ്ടനിൽ നോട്ടിംഹാമിൽ നാഷ്ണൽ കൗൺസിൽ ഓഫ് ഹിന്ദു ഹെറിറ്റേജിന്റെ നേതൃത്വത്തിൽ പിതൃതർപ്പണം നടക്കും. രാവിലെ 10.30നാണ് കർമ്മങ്ങൾ ആരംഭിക്കുക.