യുഎഇയിൽ സന്ദ‍ര്‍ശക വിസാ കാലാവധി അവസാനിച്ചവ‍ര്‍ക്ക് രാജ്യം വിടാൻ ഇനി 4 ദിവസം മാത്രം

ദുബായ്: മാർച്ച് ഒന്നിന് സന്ദർശക വിസാ കാലാവധി അവസാനിച്ചവർക്ക് പിഴ കൂടാതെ യുഎഇ വിടാൻ ഇനി നാല് ദിവസങ്ങൾ മാത്രം. കഴിഞ്ഞമാസം സമയപരിധി അവാനിക്കാനിരിക്കെ നൽകിയ ഒരുമാസത്തെ അധികസമയമാണ് സെപ്റ്റംബർ 11ന് അവസാനിക്കാൻ പോകുന്നത്.

ഫെഡറൽ അതോറിറ്റി ഓഫ് ഐഡന്റിറ്റി ആന്റ് സിറ്റിസൺഷിപ്പ് (ഐസിഎ) ഏറ്റവും അവസാനം നൽകിയ അറിയിപ്പ് പ്രകാരം സന്ദർശന വിസ കാലാവധി കഴിഞ്ഞവർക്ക് പിഴകൂടാതെ രാജ്യം വിടാനുള്ള സമയപരിധി ഓഗസ്റ്റ് 11ൽ നിന്ന് സെപ്റ്റംബർ 11 വരെയാണ് നീട്ടി നൽകിയത്. ഇതുപ്രകാരം വെള്ളിയാഴ്ചയോടെ ഈ സമയപരിധി അവസാനിക്കും. എന്നാൽ ഇത്തരക്കാർ സന്ദർശന വിസയോ തൊഴിൽ വിസയോ നേടിയാൽ ഇവർക്ക് രാജ്യത്ത് തുടരാനാകുമെന്നും ഐസിഎയുടെ അറിയിപ്പ് വ്യക്തമാക്കുന്നു.

Also Read: 10 കൊല്ലത്തെ നരകജീവിതം, വലതുകൈ അറ്റുപോകുമെന്ന അവസ്ഥ; യുഎഇയുടെ കാരുണ്യത്തിൽ ലക്ഷ്മൺ നാട്ടിലേയ്ക്ക്

വിസ പുതുക്കുയോ രാജ്യത്ത് നിന്ന് പുറത്ത് കടക്കുകയോ ചെയ്തില്ലെങ്കിൽ അനധികൃതമായി രാജ്യത്ത് കഴിഞ്ഞതിന് ഇത്തരക്കാരിൽ നിന്ന് പിഴ ഇടാക്കുമെന്ന് അധികൃതർ വ്യക്തമാക്കിയിട്ടുണ്ട്. മന്ത്രിസഭാ യോഗതീരുമാനത്തിന്‍റെ അടിസ്ഥാനത്തിലായിരുന്നു വിസാ കാലവധി കഴിഞ്ഞവർക്ക് പിഴ കൂടാതെ രാജ്യം വിടാനുള്ള സമയം നീട്ടിനൽകിയത്.

Also Read: വിദേശികളെ വേണ്ട? സ്വദേശിവത്കരണവുമായി സൗദി, തൊഴിൽ ഇല്ലാതാകുന്നത് ആർക്കെല്ലാം

കഴിഞ്ഞമാസം പുറത്തിറക്കിയ ഉത്തരവിൽ മാർച്ച് ഒന്നിന് മുമ്പ് സന്ദർശക വിസാ കാലാവധി കഴിഞ്ഞ ആളുകൾ ഓഗസ്റ്റ് 18ന് മുമ്പ് രാജ്യം വിടണമെന്നും വ്യക്തമാക്കിയിരുന്നു. നേരത്തെ ഈ വർഷം ജൂലൈയിലാണ് യുഎഇ സർക്കാർ സന്ദർശന വിസകളുടെ കാലാവധി 2020 ഡിസംബർ അവസാനം വരെ നീട്ടാനുള്ള മുൻ തീരുമാനം റദ്ദാക്കിയത്.